tawana KHubsurat jism

a.azā kā tanāsub

ragoñ meñ dauḌte zinda javāñ sarshār ḳhuuñ kī gungunāhaT

hameñ dete haiñ dāvat ishq kī

lekin

hamārī chashm-e-āhan-posh pairāhan-shanāsā hai

libāsoñ kī mohabbat

vaz-e-pairāhan ko sab kuchh maan kar

nā-bīnā āñkheñ ishq kartī haiñ

hamārī zindagī tahzīb-e-pairāhan hai

zāhir kī parastish hai

hamāre saare ādāb-e-nazārā farz kar lete haiñ

insāñ be-badan hai

badan dar-asl insāñ hai tamaddun hai mohabbat hai

badan hī ruuh hai nūr-e-harārat zindagī hai

badan hī kā karishma zehn kī taḳhlīq tasḳhīr-e-fulāñ hai

hamārī chashm-e-āhan-posh pairāhan shanāsā hai

badan kī taab lā saktī nahīñ

tahzīb-e-pairāhan na zinda hai na zehn-o-rūh rakhtī hai

hamāre būḌhe kohna aur farsūda libāsoñ se ibārat haiñ

hamāre naujavāñ maġhrib ke taaza faishanoñ ke chalte phirte ishtihārī haiñ

badan ma.adūm hai

aur be-badan rūheñ dhuāñ haiñ

be-badan az.hān āseb-e-nazāra haiñ

aaza ka tanasub

ragon mein dauDte zinda jawan sarshaar KHun ki gungunahaT

hamein dete hain dawat ishq ki

lekin

hamari chashm-e-ahan-posh pairahan-shanasa hai

libason ki mohabbat

waz-e-pairahan ko sab kuchh man kar

na-bina aankhen ishq karti hain

hamari zindagi tahzib-e-pairahan hai

zahir ki parastish hai

hamare sare aadab-e-nazara farz kar lete hain

insan be-badan hai

badan dar-asl insan hai tamaddun hai mohabbat hai

badan hi ruh hai nur-e-hararat zindagi hai

badan hi ka karishma zehn ki taKHliq tasKHir-e-fulan hai

hamari chashm-e-ahan-posh pairahan shanasa hai

badan ki tab la sakti nahin

tahzib-e-pairahan na zinda hai na zehn-o-ruh rakhti hai

hamare buDhe kohna aur farsuda libason se ibarat hain

hamare naujawan maghrib ke taza faishanon ke chalte phirte ishtihaari hain

badan madum hai

aur be-badan ruhen dhuan hain

be-badan azhan aaseb-e-nazara hain