teri yaad

maiñ tirī yaad ko siine se lagā.e guzrā

ajnabī shahr kī mashġhūl guzar gāhoñ se

bevafā.ī kī tarah phailī huī rāhoñ se

na.ī tahzīb ke ābād bayābānoñ se

dast-e-mazdūr pe hañste hue aivānoñ se

maiñ tirī yaad ko siine se lagā.e guzrā

gaañv kī do-pahrī dhuup ke sannāToñ se

ḳhushk nahroñ ke kināroñ pe thakī chhāñv se

apne dil kī tarah roī huī pag-DanDī se

maiñ tirī yaad ko siine se lagā.e pahuñchā

bastiyāñ chhoḌ ke tarse hue vīrānoñ meñ

talḳhī-e--dahr sameTe hue mai-ḳhānoñ meñ

ḳhūn-e-insān pe palte hue insānoñ meñ

jaane pahchāne hue logoñ meñ an-jānoñ meñ

maiñ tirī yaad ko siine se lagā.e pahūñchā

apne ahbāb tire ġham ke parastāroñ meñ

apnī rūThī huī taqdīr ke ġham-ḳhvāroñ meñ

apne ham-manzil-o-ham-rāsta fankāroñ meñ

aur fankār kī sāñsoñ ke ḳharīdāroñ meñ

maiñ tirī yaad ko siine se lagā.e pahuñchā

ye samajh kar ki koī aañkh idhar uTThegī

merī maġhmūm nigāhī ko mujhe samjhegī

lekin a dost ye duniyā hai yahāñ terā ġham

ek insān ko taskīn bhī de saktā hai

ek insān kā ārām bhī le saktā hai

ḳhuuñ meñ Duubī huī tahrīr bhī ban saktā hai

ek fankār kī taqdīr bhī ban saktā hai

saarī duniyā ke magar kaam nahīñ aa saktā

sab ke hoñToñ pe tirā naam nahīñ aa saktā

main teri yaad ko sine se lagae guzra

ajnabi shahr ki mashghul guzar gahon se

bewafai ki tarah phaili hui rahon se

nai tahzib ke aabaad bayabanon se

dast-e-mazdur pe hanste hue aiwanon se

main teri yaad ko sine se lagae guzra

ganw ki do-pahri dhup ke sannaTon se

KHushk nahron ke kinaron pe thaki chhanw se

apne dil ki tarah roi hui pag-DanDi se

main teri yaad ko sine se lagae pahuncha

bastiyan chhoD ke tarse hue viranon mein

talKHi-e--dahr sameTe hue mai-KHanon mein

KHun-e-insan pe palte hue insanon mein

jaane pahchane hue logon mein an-jaanon mein

main teri yaad ko sine se lagae pahuncha

apne ahbab tere gham ke parastaron mein

apni ruThi hui taqdir ke gham-KHwaron mein

apne ham-manzil-o-ham-rasta fankaron mein

aur fankar ki sanson ke KHaridaron mein

main teri yaad ko sine se lagae pahuncha

ye samajh kar ki koi aankh idhar uTThegi

meri maghmum nigahi ko mujhe samjhegi

lekin a dost ye duniya hai yahan tera gham

ek insan ko taskin bhi de sakta hai

ek insan ka aaram bhi le sakta hai

KHun mein Dubi hui tahrir bhi ban sakta hai

ek fankar ki taqdir bhi ban sakta hai

sari duniya ke magar kaam nahin aa sakta

sab ke honTon pe tera nam nahin aa sakta