thantophobia

raat kisī ke

būḌhe baap ke mar jaane kī ḳhabar sunī to

dukh se ziyāda

ḳhauf ne dil meñ jagah banā.ī

ashkoñ se pahle āñkhoñ meñ

do chehroñ kā 'aks paḌ gayā

jo is vaqt baġhal vaale kamre meñ shāyad gahrī niiñd meñ so.e hoñge

tab mujh ko mahsūs huā

ki ab maiñ aisī 'umr meñ paañv baḌhāne vaalā huuñ

jis meñ ye ḳhauf aTal hai

kitne dīgar ehsāsāt kā radd-e-'amal hai

har pal zehn meñ aaj yā kal hai

'aam maraz se baḌh kar lagne lagtī hai har ik bīmārī

kānoñ meñ kuchh alag tarah se paḌtī haiñ khāñsī kī sadā.eñ

us pe sitam to ye hai 'mohan'

mujh ko dilāsa dene vaale

mujh ko sahārā dene vaale

biich bhañvar se sāhil tak pahuñchāne vaale

dhund chhāñT ke mujh ko raah dikhāne vaale

mere saare dost

bhī merī 'umr ke hī haiñ

aur un ke māñ-bāp bhī utne hī būḌhe haiñ

jitne mere

raat kisi ke

buDhe bap ke mar jaane ki KHabar suni to

dukh se ziyaada

KHauf ne dil mein jagah banai

ashkon se pahle aankhon mein

do chehron ka 'aks paD gaya

jo is waqt baghal wale kamre mein shayad gahri nind mein soe honge

tab mujh ko mahsus hua

ki ab main aisi 'umr mein panw baDhane wala hun

jis mein ye KHauf aTal hai

kitne digar ehsasat ka radd-e-'amal hai

har pal zehn mein aaj ya kal hai

'am maraz se baDh kar lagne lagti hai har ek bimari

kanon mein kuchh alag tarah se paDti hain khansi ki sadaen

us pe sitam to ye hai 'mohan'

mujh ko dilasa dene wale

mujh ko sahaara dene wale

bich bhanwar se sahil tak pahunchane wale

dhund chhanT ke mujh ko rah dikhane wale

mere sare dost

bhi meri 'umr ke hi hain

aur un ke man-bap bhi utne hi buDhe hain

jitne mere