tere baghair

ab zindagī kā lutf kahāñ hai tire baġhair

be-kaif rang-e-kaun-o-makāñ hai tire baġhair

tujh se har ik ḳhayāl hasīn-o-jamīl thā

ab aarzū bhī bār-e-garāñ hai tire baġhair

har manzil-e-hayāt munavvar thī tere saath

tārīk har makān-o-zamāñ hai tire baġhair

tūfāñ umaD rahe haiñ dil-e-be-qarār meñ

āñkhoñ se sail-e-ashk ravāñ hai tire baġhair

vo merā ghar jo ġhairat-e-firdaus thā kabhī

dozaḳh ab us meñ sho'la-fishāñ hai tire baġhair

rangīnī-e-bahār thī jis dil meñ jalva-rez

ab us meñ daur-e-fasl-e-ḳhizāñ hai tire baġhair

baaqī rahī na sāġhar-o-mīnā meñ dilkashī

be-kaif bazm-e-pīr-e-muġhāñ hai tire baġhair

dil ban chukā hai maskan-e-soz-e-ġham-e-firāq

siina javāb-e-barq-e-tapāñ hai tire baġhair

'shaidā' phir apnā haal kahe bhī to kyā kahe

ḳhāmosh lab haiñ band zabāñ hai tire baġhair

ab zindagi ka lutf kahan hai tere baghair

be-kaif rang-e-kaun-o-makan hai tere baghair

tujh se har ek KHayal hasin-o-jamil tha

ab aarzu bhi bar-e-garan hai tere baghair

har manzil-e-hayat munawwar thi tere sath

tarik har makan-o-zaman hai tere baghair

tufan umaD rahe hain dil-e-be-qarar mein

aankhon se sail-e-ashk rawan hai tere baghair

wo mera ghar jo ghairat-e-firdaus tha kabhi

dozaKH ab us mein sho'la-fishan hai tere baghair

rangini-e-bahaar thi jis dil mein jalwa-rez

ab us mein daur-e-fasl-e-KHizan hai tere baghair

baqi rahi na saghar-o-mina mein dilkashi

be-kaif bazm-e-pir-e-mughan hai tere baghair

dil ban chuka hai maskan-e-soz-e-gham-e-firaq

sina jawab-e-barq-e-tapan hai tere baghair

'shaida' phir apna haal kahe bhi to kya kahe

KHamosh lab hain band zaban hai tere baghair