ترے بغیر
اب زندگی کا لطف کہاں ہے ترے بغیر
بے کیف رنگ کون و مکاں ہے ترے بغیر
تجھ سے ہر اک خیال حسین و جمیل تھا
اب آرزو بھی بار گراں ہے ترے بغیر
ہر منزل حیات منور تھی تیرے ساتھ
تاریک ہر مکان و زماں ہے ترے بغیر
طوفاں امڈ رہے ہیں دل بے قرار میں
آنکھوں سے سیل اشک رواں ہے ترے بغیر
وہ میرا گھر جو غیرت فردوس تھا کبھی
دوزخ اب اس میں شعلہ فشاں ہے ترے بغیر
رنگینیٔ بہار تھی جس دل میں جلوہ ریز
اب اس میں دور فصل خزاں ہے ترے بغیر
باقی رہی نہ ساغر و مینا میں دل کشی
بے کیف بزم پیر مغاں ہے ترے بغیر
دل بن چکا ہے مسکن سوز غم فراق
سینہ جواب برق تپاں ہے ترے بغیر
شیداؔ پھر اپنا حال کہے بھی تو کیا کہے
خاموش لب ہیں بند زباں ہے ترے بغیر
مأخذ:
دل کی آواز (Pg. 120)
- مصنف: شیدا انبالوی
-
- ناشر: اعلیٰ پرنٹنگ پریس، دہلی
- سن اشاعت: 1982
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
