titanic

dabistān-e-urdu ke gahre samundar kī

tah meñ se ik din

mirī nazm ġhota-zanoñ ko milegī

vahī nazm jo maiñ ne tum par likhī hai

phir us nazm ke rāste log ham tak pahuñchne lageñge

tumheñ bhī tasavvur meñ laane lageñge

mujhe bhī tasavvur meñ laane lageñge

phir ik din

hamārī kahānī pe filmeñ baneñgī

mohabbat ke raste meñ

chāhe samājī ma'āshī

yā diinī masā.il ke

tuude tabāhī machā deñ

maiñ har film ke āḳhirī scene meñ

tum ko zinda rakhūñgā

bhale mere siine meñ

barfīle lafzoñ kī tah jam chukī ho

maiñ phir bhī tumhāre liye saañs lūñgā

maiñ nazmeñ likhūñgā

maiñ tum se mohabbat nibhātā rahūñgā

tumheñ Dūbne se bachātā rahūñgā

dabistan-e-urdu ke gahre samundar ki

tah mein se ek din

meri nazm ghota-zanon ko milegi

wahi nazm jo main ne tum par likhi hai

phir us nazm ke raste log hum tak pahunchne lagenge

tumhein bhi tasawwur mein lane lagenge

mujhe bhi tasawwur mein lane lagenge

phir ek din

hamari kahani pe filmen banengi

mohabbat ke raste mein

chahe samaji ma'ashi

ya dini masail ke

tude tabahi macha den

main har film ke aaKHiri scene mein

tum ko zinda rakhunga

bhale mere sine mein

barfile lafzon ki tah jam chuki ho

main phir bhi tumhaare liye sans lunga

main nazmen likhunga

main tum se mohabbat nibhata rahunga

tumhein Dubne se bachata rahunga