titli

kyā huā hai ai sākinān-e-chaman

kyoñ fazā.eñ huiiñ tamāshā.ī

tum to kahte the fasl-e-gul aa.ī

phir ye gulshan udaas kyoñ hai aaj

yuuñ fasurda bahār kyoñ hai aaj

vo vahāñ duur zard Tahnī par

ik parinda udaas baiThā hai

ek bhañvrā guloñ ko jā jā kar

ranj-o-ġham kā payām detā hai

suur phūñkā hai kyā havāoñ ne

is qadar shor kyoñ fazāoñ meñ

mātamoñ kī sadā.eñ aatī haiñ

bulbuleñ kis kā nauha gaatī haiñ

kaisī qaus-e-quzah yahāñ bikhrī

nīm-murda paḌī hai ik titlī

aah ye dil-nashīñ hasīñ paikar

kis ne marne ko tanhā chhoḌ diyā

khiltī kaliyoñ kī narm pattī ko

kis ne vahshat meñ aa ke toḌ diyā

sabz shāḳhoñ pe ye lahū kyoñ hai

in havāoñ meñ ḳhuun kī bū hai

taaza phūloñ pe surḳh chhīñTe haiñ

kis ne titlī ke pankh noche haiñ

kya hua hai ai sakinan-e-chaman

kyon fazaen huin tamashai

tum to kahte the fasl-e-gul aai

phir ye gulshan udas kyon hai aaj

yun fasurda bahaar kyon hai aaj

wo wahan dur zard Tahni par

ek parinda udas baiTha hai

ek bhanwra gulon ko ja ja kar

ranj-o-gham ka payam deta hai

sur phunka hai kya hawaon ne

is qadar shor kyon fazaon mein

matamon ki sadaen aati hain

bulbulen kis ka nauha gati hain

kaisi qaus-e-quzah yahan bikhri

nim-murda paDi hai ek titli

aah ye dil-nashin hasin paikar

kis ne marne ko tanha chhoD diya

khilti kaliyon ki narm patti ko

kis ne wahshat mein aa ke toD diya

sabz shaKHon pe ye lahu kyon hai

in hawaon mein KHun ki bu hai

taza phulon pe surKH chhinTe hain

kis ne titli ke pankh noche hain