tulu-e-manzar ki aankh chup hai

su.ūbat-e-jāñ qaran qaran hai

zakāt-e-mohlat hai lamha lamha

vo uñgliyāñ ab thakī huī haiñ

jinhoñ ne

barg-e-ḳhazāñ-zada kī hatheliyoñ par

badan kī pahlī sadā likhī thī

lahū kī pahlī duā likhī thī

jinhoñ ne aiman kī vādiyoñ meñ

hajar hajar par

tamām maḳhlūq-e-arz ke naam

zindagī ke itaab likkhe

sadāqatoñ ke nisāb likkhe

vo hoñT bhī

ab lahū lahū haiñ

jinhoñ ne pusht-e-safar pe mohar-e-fanā ko chūmā

jinhoñ ne sahrā meñ shaam aa.ī

to os ke buuñd buuñd girne kī

aarzū ke salām phere

jinhoñ ne har sub.h

ūñTnī ke thanoñ se bahtī kiran kiran par

yatīm bachchoñ ko pālne kā savāb māñgā

ḳhudā se apnī musībatoñ kā hisāb māñgā

vo saarī āñkheñ

ġhurūb-e-manzar ke daldaloñ meñ dhañsī huī haiñ

jinhoñ ne sahrā meñ

chashma-e-sub.h-e-sandlīñ par

vo log dekhe

jo halqa halqa inaad meñ the

giroh-e-ahl-e-fasād meñ the

jinhoñ ne sarsabz shāḳh-sāroñ ke saa.e saa.e

guzartī nahroñ ke ḳhvāb dekhe

safar safar bas sarāb dekhe

su.ūbat-e-jāñ qaran qaran hai

zakāt-e-mohlat hai lamha lamha

suubat-e-jaan qaran qaran hai

zakat-e-mohlat hai lamha lamha

wo ungliyan ab thaki hui hain

jinhon ne

barg-e-KHazan-zada ki hatheliyon par

badan ki pahli sada likhi thi

lahu ki pahli dua likhi thi

jinhon ne aiman ki wadiyon mein

hajar hajar par

tamam maKHluq-e-arz ke nam

zindagi ke itab likkhe

sadaqaton ke nisab likkhe

wo honT bhi

ab lahu lahu hain

jinhon ne pusht-e-safar pe mohar-e-fana ko chuma

jinhon ne sahra mein sham aai

to os ke bund bund girne ki

aarzu ke salam phere

jinhon ne har subh

unTni ke thanon se bahti kiran kiran par

yatim bachchon ko palne ka sawab manga

KHuda se apni musibaton ka hisab manga

wo sari aankhen

ghurub-e-manzar ke daldalon mein dhansi hui hain

jinhon ne sahra mein

chashma-e-subh-e-sandlin par

wo log dekhe

jo halqa halqa inad mein the

giroh-e-ahl-e-fasad mein the

jinhon ne sarsabz shaKH-saron ke sae sae

guzarti nahron ke KHwab dekhe

safar safar bas sarab dekhe

suubat-e-jaan qaran qaran hai

zakat-e-mohlat hai lamha lamha