aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تم نے لکھا ہے

پریم واربرٹنی

تم نے لکھا ہے

پریم واربرٹنی

MORE BYپریم واربرٹنی

    تم نے لکھا ہے مرے خط مجھے واپس کر دو

    ڈر گئیں حسن دل آویز کی رسوائی سے

    میں نہ کہتا تھا کہ تم مجھ سے محبت نہ کرو

    یوں نہ کھیلو مرے جذبات کی رعنائی سے

    سب سمجھتے تھے ہمیشہ مجھے جان محفل

    اب مرا حال تو پوچھو مری تنہائی سے

    تم نئی بزم سجا لو گی تمہارا کیا ہے

    تمہیں ڈھونڈیں گی کہاں میری سلگتی راتیں

    بھول ہی جاؤ گی دو چار دنوں میں تم تو

    دو دھڑکتے ہوئے بے تاب دلوں کی باتیں

    میں کہاں جاؤں گا محرومیٔ دل کو لے کر

    پھوٹ کر روئیں گی جس وقت بھری برساتیں

    کاش کچھ پیار کا انجام تو سوچا ہوتا

    چھین لی میری جوانی سے جوانی تم نے

    میں نہ کہتا تھا کہ تم مجھ سے محبت نہ کرو

    لاکھ سمجھایا مگر ایک نہ مانی تم نے

    تم نہ مانو تو بھلا کون کہے کون سنے

    پیار پوجا ہے پرستش ہے تجارت تو نہیں

    سونے چاندی کے لئے عشق کو ٹھکرا دینا

    کھیل ہو سکتا ہے معیار محبت تو نہیں

    تم زر و سیم کی میزان میں تل سکتی ہو

    پیار بکتا نہیں چاہت کا کوئی مول نہیں

    اس سے پہلے کہ مرے عشق پر الزام دھرو

    دیکھ لو حسن کی فطرت میں تو کچھ جھول نہیں

    اپنے ہی لکھے ہوئے چند خطوں کی خاطر

    مجھ سے خائف ہی نہیں خود سے بھی بیزار ہو تم

    کشتیٔ حسن کی ٹوٹی ہوئی پتوار ہو تم

    تم ہو خود اپنے ہی احساس کی ٹھکرائی ہوئی

    اپنے انجام سے سہمی ہوئی گھبرائی ہوئی

    کس لئے آج نظر آتی ہو کھوئی کھوئی

    کھیلنے ہی کی تمنا تھی تو مجھ سے کہتیں

    تمہیں بازار سے لا دیتا کھلونا کوئی

    آج کی بات نہیں بات بہت دیر کی ہے

    میں نے سمجھا تھا مری روح کی آواز ہو تم

    نشۂ حسن کی اک لہر ہو مچلی ہوئی لہر

    اک لجاتا ہوا شرماتا ہوا راز ہو تم

    تم ہو وہ راز کہ جس راز کو ہر لمحے نے

    شعر و نغمہ کی فضاؤں میں سجائے رکھا

    تم ہو وہ راز کہ جس راز کی رعنائی کو

    میں نے احساس کے سینے سے لگائے رکھا

    وہ لجاتا ہوا شرماتا ہوا راز جسے

    میں نے اپنی بھی نگاہوں سے چھپائے رکھا

    جی میں آتا ہے کہ اس راز کو رسوا کر دوں

    کیوں نہ ہر ناز کو انداز کو رسوا کر دوں

    توڑ دوں شوخ کھنکتے ہوئے گجروں کا غرور

    مست پازیب کی آواز کو رسوا کر دوں

    جی میں آتا ہے کہ میں بھی تمہیں بدنام کروں

    تمہیں بدنام کروں اور سر عام کرو

    آخر انسان ہوں میں بھی کوئی پتھر تو نہیں

    میں بھی سینے میں دھڑکتا ہوا دل رکھتا ہوں

    مجھ کو بھی پیار سے خوابوں سے تمہاری ہی طرح

    مجھ کو بھی اپنی جواں سال امنگیں ہیں عزیز

    میری فطرت کو بھی ہے اشک و تبسم میں تمیز

    میں نے سوچا ہے کہ میں بھی تمہیں بدنام کروں

    لیکن افسوس کہ یہ مجھ سے نہیں ہو سکتا

    تم نے سمجھا نہ محبت کے اشاروں کا مزاج

    تم نے دیکھی نہ دھڑکتے ہوئے جذبوں کی سرشت

    میرے وجدان نے تخلیق کیا تھا جس کو

    تم نے خود آپ جلایا ہے وہ خوابوں کا بہشت

    تم نے جس طرح جلایا ہے رلایا ہے مجھے

    آج کیوں میں بھی اسی طرح رلاؤں نہ تمہیں

    دیکھ پائیں گی نہ جس رخ کو تمہاری آنکھیں

    آج تصویر کا وہ رخ بھی دکھاؤں نہ تمہیں؟

    کاش تم نے کبھی سوچا کبھی سمجھا ہوتا

    میں نے کیا کچھ نہ کیا حسن کی عظمت کے لئے

    کون سے دکھ نہ سہے کون سے طعنے نہ سنے

    فکر و احساس کے شاداب گلستانوں سے

    تم نے کلیاں ہی چنیں میں نے تو کانٹے بھی چنے

    میں ہی بیگانہ رہا اپنی حقیقت سے مگر

    تم نے حالات کے عنوان کو پہچان لیا

    اپنے بہکے ہوئے جذبات کی تسکیں کے لئے

    تم نے منہ زور جوانی کا کہا مان لیا

    تم نے پرجوش روایات کی رو میں بہہ کر

    کر دیا گردش دوراں کے حوالے مجھ کو

    کون اب چاند ستاروں میں مجھے لے جائے

    کون اب ذہن کی ظلمت سے نکالے مجھ کو

    عشق اور حسن کو بدنام کرے کیا معنی

    یہ تو وہ داغ ہے کردار کی پیشانی پر

    وقت صدیوں جسے روئے تو نہیں دھو سکتا

    کون پوچھے گا بھلا مجھ سے مرے دل کی مراد

    کتنا گہرا ہے محبت کے تقاضوں کا تضاد

    میں تو کہتا ہوں کہ تم پیار سے جھولی بھر دو

    تم نے لکھا ہے مرے خط مجھے واپس کر دو

    اب جو چاہو وہ کرو رحم و کرم ہو کہ ستم

    اب نہیں طرز تغافل کا مرے عشق کو غم

    شوق سے میری تمناؤں کی بربادی ہو

    کچھ بھی ہو تم مرے احساس کی شہزادی ہو

    مأخذ:

    Khushbu Ka Khwab (Pg. 40)

    • مصنف: Prem Warbartani
      • اشاعت: 1976
      • ناشر: Miss V. D. Kakkad
      • سن اشاعت: 1976

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY

    Jashn-e-Rekhta | 8-9-10 December 2023 - Major Dhyan Chand National Stadium, Near India Gate - New Delhi

    GET YOUR PASS
    بولیے