tumhaara ajnabi

tumhāre shahr meñ vo pā-barahna ajnabī

tulū'-e-āftāb ke liye

shab-e-garāñ ke rāstoñ se

ḳhāmushī ke dasht se guzar gayā

nidā-e-muntazir kī chashm-e-ḳhud-adā meñ

sub.h-dam utar gayā

darīche jab khule

tumhārā shahr raushnī meñ maujzan thā duur tak

tulū'-e-āftāb

rang-o-bū kā kārvāñ liye hue

safīna-e-adā-e-nūr-e-kāmrāñ liye hue

hasīn āñchaloñ ke lahlahāte bādbāñ liye hue

har ek rahguzar pe aise chhā gayā

masarratoñ mohabbatoñ hasīn muskurāhaToñ kī jannateñ luTā gayā

tulū'-e-āftāb barg-e-surḳh thā

vo ajnabī tumhāre shahr meñ vo be-zabān ajnabī

magar fishār-e-tīrgī kī sard ḳhaak zard dhund kā

muhīb marg-āshnā sā zā.iqa

na jaane kyoñ lab-o-zabāñ pe jism-o-jāñ pe jheltā rahā

na jaane kyoñ vo marg-o-zindagī ke zer-o-bam se kheltā rahā

tumhārā ajnabī tumhāre shahr meñ

agarche rū-ba-rū thā manzar-e-tulū'-e-āftāb ke

tumhārā rū-e-zar-nigār

ḳhūb-tar hasīn-tar thā garche manzar-e-tulū-e-āftāb se

magar tumhārā rū-e-zar-nigār

rauzan-e-dayār-e-dīd kī hadoñ se aaj māvarā rahā

tumhārā ajnabī tumhāre shahr meñ

tumhārā kaun thā ki jism-o-jāñ kī tīrgī ke jangaloñ meñ kho gayā

hasīn chamchamātī dhuup meñ

udaas sāhiloñ fasurda vādiyoñ meñ so gayā

tumhaare shahr mein wo pa-barahna ajnabi

tulu'-e-aftab ke liye

shab-e-garan ke raston se

KHamushi ke dasht se guzar gaya

nida-e-muntazir ki chashm-e-KHud-ada mein

subh-dam utar gaya

dariche jab khule

tumhaara shahr raushni mein maujzan tha dur tak

tulu'-e-aftab

rang-o-bu ka karwan liye hue

safina-e-ada-e-nur-e-kaamran liye hue

hasin aanchalon ke lahlahate baadban liye hue

har ek rahguzar pe aise chha gaya

masarraton mohabbaton hasin muskurahaTon ki jannaten luTa gaya

tulu'-e-aftab barg-e-surKH tha

wo ajnabi tumhaare shahr mein wo be-zaban ajnabi

magar fishaar-e-tirgi ki sard KHak zard dhund ka

muhib marg-ashna sa zaiqa

na jaane kyon lab-o-zaban pe jism-o-jaan pe jhelta raha

na jaane kyon wo marg-o-zindagi ke zer-o-bam se khelta raha

tumhaara ajnabi tumhaare shahr mein

agarche ru-ba-ru tha manzar-e-tulu'-e-aftab ke

tumhaara ru-e-zar-nigar

KHub-tar hasin-tar tha garche manzar-e-tulu-e-aftab se

magar tumhaara ru-e-zar-nigar

rauzan-e-dayar-e-did ki hadon se aaj mawara raha

tumhaara ajnabi tumhaare shahr mein

tumhaara kaun tha ki jism-o-jaan ki tirgi ke jangalon mein kho gaya

hasin chamchamati dhup mein

udas sahilon fasurda wadiyon mein so gaya