tumhaare nam likhta hun

sunahrī dhuup kā manzar

ga.e mausam kī shādābī

shafaq kī reshmī girheñ

chāñd ke pahlū meñ lipTī sabz shāḳheñ

kisī TuuTe hue taare kī dhundlī sī lakīreñ

naqsh jin ke ret par bahte rahe barsoñ

safar kī dā.imī ḳhushbū

maiñ jis kī aarzū le kar tumhāre paas aayā thā

kitāb-e-dil kī vo dhaḌkan

tumhāre naam likhtā huuñ

paroñ par titliyoñ ke tairtī sargam

jo lafzoñ meñ kabhī Dhalne na paa.ī

vo maddham saaz kī jumbish

ujāle sub.h ke dastak havāoñ kī

maiñ apnī soch kī TeḌhī lakīreñ

jo kabhī aa.iiñ sadā ban kar

ḳhalā ban kar jo lauTī haiñ

kisī be-nām sahrā meñ

tumhāre naam likhtā huuñ

guzartī sā.atoñ kī talḳhiyāñ ra.anā.iyāñ

āvārgī apnī

tilism-e-āgahī ke ḳhvāb paikar

phuul titlī rang bārish qahqahe

ḳhazāne lafz-o-ma.anī ke

salīqe guftugū ke

narm lahje kī ravāñ lahreñ

mohabbat kī purānī dāstāñ

tum ne kahī maiñ ne sunī

maiñ ne kahī tum ne sunī

tumhāre naam likhtā huuñ

mujhe ab surḳh-rū kar do

mire sab ḳhvāb chorī ho ga.e haiñ

ḳhvāb kī manzil nayā ik ḳhvāb hai

mire dāman meñ ḳhvābīda

na jaane kitne ḳhāke kitne naqshe

āḳhirī sāñsoñ pe haiñ

tasvīr un ḳhvāboñ kī ab maiñ sauñp kar tujh ko

nayā ik baab likhtā huuñ

tumhāre naam likhtā huuñ

sunahri dhup ka manzar

gae mausam ki shadabi

shafaq ki reshmi girhen

chand ke pahlu mein lipTi sabz shaKHen

kisi TuTe hue tare ki dhundli si lakiren

naqsh jin ke ret par bahte rahe barson

safar ki daimi KHushbu

main jis ki aarzu le kar tumhaare pas aaya tha

kitab-e-dil ki wo dhaDkan

tumhaare nam likhta hun

paron par titliyon ke tairti sargam

jo lafzon mein kabhi Dhalne na pai

wo maddham saz ki jumbish

ujale subh ke dastak hawaon ki

main apni soch ki TeDhi lakiren

jo kabhi aain sada ban kar

KHala ban kar jo lauTi hain

kisi be-nam sahra mein

tumhaare nam likhta hun

guzarti saaton ki talKHiyan ranaiyan

aawargi apni

tilism-e-agahi ke KHwab paikar

phul titli rang barish qahqahe

KHazane lafz-o-mani ke

saliqe guftugu ke

narm lahje ki rawan lahren

mohabbat ki purani dastan

tum ne kahi main ne suni

main ne kahi tum ne suni

tumhaare nam likhta hun

mujhe ab surKH-ru kar do

mere sab KHwab chori ho gae hain

KHwab ki manzil naya ek KHwab hai

mere daman mein KHwabida

na jaane kitne KHake kitne naqshe

aaKHiri sanson pe hain

taswir un KHwabon ki ab main saunp kar tujh ko

naya ek bab likhta hun

tumhaare nam likhta hun