tu

kyā kahūñ tujh ko maiñ kyā kah ke pukāroñ tujh ko

jaise qāsid koī ik pyaar meñ Duube ḳhat ko

band darvāze ke palloñ meñ phañsā detā hai

aur ḳhat dekh ke ik ishq meñ pāband nazar

dil-e-ma.ashūq kī har baat samajh jaatī hai

tū khiñchī aatī hai yuuñ haule se merī jānib

ḳhāna-e-dil meñ usī pyaar bhare ḳhat kī tarah

hasrat-e-chashm mirī tujh meñ simaT jaatī hai

zehn meñ azm nigāhoñ meñ ka.ī ḳhvāb liye

shāḳh-e-dil meñ mirī tū ristī chalī aatī hai

rañg aur nuur fazā kā bhī sañvar jaatā hai

mire jazbāt ko tū ishq sikhā jaatī hai

kyā kahūñ tujh ko maiñ kyā kah ke pukāroñ tujh ko

terī āñkhoñ kā tasavvur tire gāloñ kī mahak

jazba-e-rūh meñ tūfān uThā jaate haiñ

zehn-o-dil par likhe tārīḳh ke panne panne

terī chāhat meñ yūñhī miTte chale jaate haiñ

ātish-e-ishq se khultā huā kundan sā badan

ḳhud-ba-ḳhud naqsh huā jaatā hai jān-o-dil par

ḳhud-ba-ḳhud paañv nikal paḌte haiñ terī jānib

bāġhbāñ dil ko koī jaise ki mil jaatā hai

aur har samt faqat tū hī nazar aatī hai

kyā kahūñ tujh ko maiñ kyā kah ke pukāroñ tujh ko

kyuuñ ye mahsūs mujhe hotā hai lamha lamha

merī duniyā tirī chāhat ke sivā kuchh bhī nahīñ

aaj tū hī to hai dastūr tasavvur kā mire

jaise duniyā meñ mirā tere sivā koī nahīñ

merī shāḳhoñ pe tire naam ke gul khilte haiñ

mere pattoñ meñ tire rañg hare bahte haiñ

aaj pairoñ meñ thirakte haiñ tire nāz-o-adā

mere naġhmoñ ko tū pur-kaif banā detī hai

kyā kahūñ tujh ko maiñ kyā kah ke pukāroñ tujh ko

kya kahun tujh ko main kya kah ke pukaron tujh ko

jaise qasid koi ek pyar mein Dube KHat ko

band darwaze ke pallon mein phansa deta hai

aur KHat dekh ke ek ishq mein paband nazar

dil-e-mashuq ki har baat samajh jati hai

tu khinchi aati hai yun haule se meri jaanib

KHana-e-dil mein usi pyar bhare KHat ki tarah

hasrat-e-chashm meri tujh mein simaT jati hai

zehn mein azm nigahon mein kai KHwab liye

shaKH-e-dil mein meri tu risti chali aati hai

rang aur nur faza ka bhi sanwar jata hai

mere jazbaat ko tu ishq sikha jati hai

kya kahun tujh ko main kya kah ke pukaron tujh ko

teri aankhon ka tasawwur tere galon ki mahak

jazba-e-ruh mein tufan uTha jate hain

zehn-o-dil par likhe tariKH ke panne panne

teri chahat mein yunhi miTte chale jate hain

aatish-e-ishq se khulta hua kundan sa badan

KHud-ba-KHud naqsh hua jata hai jaan-o-dil par

KHud-ba-KHud panw nikal paDte hain teri jaanib

baghban dil ko koi jaise ki mil jata hai

aur har samt faqat tu hi nazar aati hai

kya kahun tujh ko main kya kah ke pukaron tujh ko

kyun ye mahsus mujhe hota hai lamha lamha

meri duniya teri chahat ke siwa kuchh bhi nahin

aaj tu hi to hai dastur tasawwur ka mere

jaise duniya mein mera tere siwa koi nahin

meri shaKHon pe tere nam ke gul khilte hain

mere patton mein tere rang hare bahte hain

aaj pairon mein thirakte hain tere naz-o-ada

mere naghmon ko tu pur-kaif bana deti hai

kya kahun tujh ko main kya kah ke pukaron tujh ko