udas naslen

maiñ roz-e-avval kī ik kahānī

tumheñ sunā.ūñ to ro paḌoge

maiñ ek musht-e-ġhubār thā jab

jise sameTā gayā thā shāyad

ik aise sahrā.ī sar-zamīñ se

jahāñ pe vahshat utar rahī thī

udāsiyoñ kā 'ajab samāñ thā

us ek musht-e-ġhubār se jab faqīr tajsīm ho rahā thā

aur āb-o-gil ke usī tanāsub meñ ek shai thī jo jazb hotī chalī ga.ī thī

maiñ ik jahān-e-ḳharāb ke biich ban rahā thā

vahāñ kā manzar bhī dekh liije

baġhal meñ vahshat khaḌī huī thī

vahīñ junūñ kā thā raqs jaarī

aur aisī hālat meñ ek shai jo badan ke andar utar chukī thī

na jaane kaisā 'ajab ta'alluq thā us se merā

ki chaah ke bhī maiñ us se dāman chhuḌā na paayā

mujh aise sahrā-navard logoñ ke mas.aloñ ko vo jāntī thī

use pata thā ki hijratoñ meñ inheñ dilāse kī aas hogī bichhaḌ ga.e to kisī sahāre kī vāqa'ī meñ talāsh hogī

jo dukh zamāne ke kachchī 'umroñ se jhelte haiñ

batāo aise meñ kaun hogā jo in ko shāna 'atā karegā

vo kaun hogā jo in ke jazboñ kī kashtiyoñ ko bas ek tinkā dikhā ke phir se bahāv degā

vo kashtiyāñ bhī kuchh is tarah kī jo mauj-e-dariyā meñ Dūbne kī aḳhīr had ko pahuñch chukī hoñ

inhīñ masā.il ko sāmne rakh ke roz-e-avval vo āb-o-gil ke usī tanāsub meñ jazb hotī chalī ga.ī thī

usī udāsī kī hī rifāqat mujh aise āshufta-sar ko zinda kiye hue hai

jo roz-e-avval se is badan kī siyāhiyoñ meñ ghirī huī hai

maiñ hañs paḌūñ to vo mujh meñ jhalke

jo rone lag jā.ūñ mujh se lipTe

inhīñ mukammal udāsiyoñ kī 'ajīb rangat batā rahī hai

ki mere aage kī aane vaalī tamām nasleñ udaas hoñgī

main roz-e-awwal ki ek kahani

tumhein sunaun to ro paDoge

main ek musht-e-ghubar tha jab

jise sameTa gaya tha shayad

ek aise sahrai sar-zamin se

jahan pe wahshat utar rahi thi

udasiyon ka 'ajab saman tha

us ek musht-e-ghubar se jab faqir tajsim ho raha tha

aur aab-o-gil ke usi tanasub mein ek shai thi jo jazb hoti chali gai thi

main ek jahan-e-KHarab ke bich ban raha tha

wahan ka manzar bhi dekh lije

baghal mein wahshat khaDi hui thi

wahin junun ka tha raqs jari

aur aisi haalat mein ek shai jo badan ke andar utar chuki thi

na jaane kaisa 'ajab ta'alluq tha us se mera

ki chah ke bhi main us se daman chhuDa na paya

mujh aise sahra-naward logon ke masalon ko wo jaanti thi

use pata tha ki hijraton mein inhen dilase ki aas hogi bichhaD gae to kisi sahaare ki waqa'i mein talash hogi

jo dukh zamane ke kachchi 'umron se jhelte hain

batao aise mein kaun hoga jo in ko shana 'ata karega

wo kaun hoga jo in ke jazbon ki kashtiyon ko bas ek tinka dikha ke phir se bahaw dega

wo kashtiyan bhi kuchh is tarah ki jo mauj-e-dariya mein Dubne ki aKHir had ko pahunch chuki hon

inhin masail ko samne rakh ke roz-e-awwal wo aab-o-gil ke usi tanasub mein jazb hoti chali gai thi

usi udasi ki hi rifaqat mujh aise aashufta-sar ko zinda kiye hue hai

jo roz-e-awwal se is badan ki siyahiyon mein ghiri hui hai

main hans paDun to wo mujh mein jhalke

jo rone lag jaun mujh se lipTe

inhin mukammal udasiyon ki 'ajib rangat bata rahi hai

ki mere aage ki aane wali tamam naslen udas hongi