ufaq pe

vo ek maiñ hī nahīñ huuñ

na jaane kitne haiñ

jo sochte haiñ samajhte haiñ chāhte bhī haiñ

ki phūTtī huī pahlī kiran se bhī pahle

ufuq pe vaqt ke chamkeñ

nayā sā rañg bhareñ

jo sub.h ho

to nasīm-e-sahar kā saath dhareñ

samīr ban ke baheñ

rañg-o-bū kī dhartī par

guloñ se baat kareñ

har galī se khul khileñ

magar ye vaqt

ye sahmā huā Darā huā vaqt

ye apne saa.e se bidkā

ye hāñptā huā vaqt

kabhī idhar ko ravāñ hai kabhī udhar ko davāñ

sapīda-e-saharī kyā

savād-e-shām kahāñ

ufuq pe kuchh bhī nahīñ

hai bas ik ġhalīz dhuāñ

wo ek main hi nahin hun

na jaane kitne hain

jo sochte hain samajhte hain chahte bhi hain

ki phuTti hui pahli kiran se bhi pahle

ufuq pe waqt ke chamken

naya sa rang bharen

jo subh ho

to nasim-e-sahar ka sath dharen

samir ban ke bahen

rang-o-bu ki dharti par

gulon se baat karen

har gali se khul khilen

magar ye waqt

ye sahma hua Dara hua waqt

ye apne sae se bidka

ye hanpta hua waqt

kabhi idhar ko rawan hai kabhi udhar ko dawan

sapida-e-sahari kya

sawad-e-sham kahan

ufuq pe kuchh bhi nahin

hai bas ek ghaliz dhuan