uktae hue badan

umr kī Dhaltī huī dopahar meñ

ThanDī havā ke jhoñke kā ehsās bhī

aadmī ko tāza-dam kar detā hai

aur agar sach-much ḳhunuk havā.eñ

thakan-nasīb jism se khelne lageñ

to shab kī tārīkī ḳhizāb jaisī dikhā.ī detī hai

ās-pās gardish kartā huā sannāTā

ārzūoñ kī gahmāgahmī se gūñjne lagtā hai

ḳhvāb ta.abīroñ kī talāsh meñ bhaTakne lagte haiñ

badan kī uktāhaTeñ chaupāl ke shor-sharābe meñ Duub jaatī haiñ

Dhalte hue sūraj kī laalī se suhāg joḌe kī ḳhushbū

aane lagtī hai

lekin ḳhvābīda ārzūoñ kī shāhrāh se guzarte hue

log

apnī manzil kā patā bhuul jaate haiñ

isī patā bhūlne ko samāj

dharm aur maz.hab kī aaḌ le kar

aisī ba-hūda gāliyāñ detā hai

jo tvāifoñ ke mohalloñ meñ bhī nahīñ

sunā.ī detīñ

umr ki Dhalti hui dopahar mein

ThanDi hawa ke jhonke ka ehsas bhi

aadmi ko taza-dam kar deta hai

aur agar sach-much KHunuk hawaen

thakan-nasib jism se khelne lagen

to shab ki tariki KHizab jaisi dikhai deti hai

aas-pas gardish karta hua sannaTa

aarzuon ki gahmagahmi se gunjne lagta hai

KHwab tabiron ki talash mein bhaTakne lagte hain

badan ki uktahaTen chaupal ke shor-sharabe mein Dub jati hain

Dhalte hue suraj ki lali se suhag joDe ki KHushbu

aane lagti hai

lekin KHwabida aarzuon ki shahrah se guzarte hue

log

apni manzil ka pata bhul jate hain

isi pata bhulne ko samaj

dharm aur mazhab ki aaD le kar

aisi ba-huda galiyan deta hai

jo twaifon ke mohallon mein bhi nahin

sunai detin