uljhaw

jaag thakī bojhal āñkhoñ meñ

sone kā ehsās jagā de

mere jazboñ meñ uljhe

apnī yādoñ ke sab lamhe

aa kar suljhā de

mujh ko batā de

kab tak tere ḳhayāl ke pyāse sahrā ko

apne hī lahū se sīñchūñ maiñ

kab tak ye ḳhud-rau paude gulzār karūñ

kab tak in āñkhoñ ke donoñ pyāloñ meñ

phuul ye bīnā.ī ke sajā.e rakkhūñ maiñ

kab tak chehroñ kī manDī meñ

chup kā maiñ byopār karūñ

Dar hai jazboñ ke na kahīñ ye daam girā de

jaag thakī bojhal āñkhoñ meñ

sone kā ehsās jagā de

yuuñ to nahīñ the tere safar ke saare raste

mub.ham mub.ham

yuuñ to nahīñ thā shāḳh-e-vasl pe phūloñ ke

khilne kā mausam

yuuñ to nahīñ hai

is furqat meñ jaañ se guzar jaane kā 'ālam

yuuñ to na hogā

lamha lamha fart-e-junūñ meñ ‘arsa-e-mātam

ye lamha bhī chhūT na jaa.e

dil se rishta TuuT na jaa.e

dil ko vasl kī aahaT ke andāz batā de

jaag thakī bojhal āñkhoñ meñ

sone kā ehsās jagā de

jag thaki bojhal aankhon mein

sone ka ehsas jaga de

mere jazbon mein uljhe

apni yaadon ke sab lamhe

aa kar suljha de

mujh ko bata de

kab tak tere KHayal ke pyase sahra ko

apne hi lahu se sinchun main

kab tak ye KHud-rau paude gulzar karun

kab tak in aankhon ke donon pyalon mein

phul ye binai ke sajae rakkhun main

kab tak chehron ki manDi mein

chup ka main byopar karun

Dar hai jazbon ke na kahin ye dam gira de

jag thaki bojhal aankhon mein

sone ka ehsas jaga de

yun to nahin the tere safar ke sare raste

mubham mubham

yun to nahin tha shaKH-e-wasl pe phulon ke

khilne ka mausam

yun to nahin hai

is furqat mein jaan se guzar jaane ka 'alam

yun to na hoga

lamha lamha fart-e-junun mein ‘arsa-e-matam

ye lamha bhi chhuT na jae

dil se rishta TuT na jae

dil ko wasl ki aahaT ke andaz bata de

jag thaki bojhal aankhon mein

sone ka ehsas jaga de