unhen mujhse shikayat hai

unheñ mujh se shikāyat hai ki maiñ maazī meñ jiitī huuñ

mire ash.ār meñ aaseb haiñ guzre zamānoñ ke

vo kahte haiñ kī yādeñ saa.e kī mānind mere saath rahtī haiñ

ye sach hai is se kab inkār hai mujh ko

maiñ aksar jāgte din meñ bhī āñkheñ muuñd letī huuñ

koī sūrat koī āvāz koī zā.iqa yā lams jab jaadū jagātā hai

to gard-ālūd mīnā-taur tasvīreñ achānak bolne lagtī haiñ nāTak-manch sajtā hai

kisī TuuTe hue sandūq meñ rakkhe hue

bosīda maḳhtūte se koī dāstāñ tamsīl ban jaatī hai

jī uThte haiñ sab kirdār maazī ke

sipāhī bādshāh ḳhil.at navādir raqs-o-mausīqī

kisī ke paañv meñ paa.el dhanak āñchal

kisī shamshīr kī bijlī ghanī barsāt kī badlī

kisī bāra-darī meñ raag dīpak kā

kisī sehn-e-gulistāñ meñ kadam ke peḌ par baiThī huī chiḌiyāñ

achānak jaag jaatī haiñ

kisī gumnām qasbe meñ koī TuuTī huī mehrāb ḳhasta-hāl-DevḌhī kī jhalak

ma.adūm kar detī hai hotel chā.e-ḳhāne bas ke adde Dher kuuḌe ke

ka.ī sadiyāñ guzar jaatī haiñ sar se

aur koī gum-gashta shahr-e-raftagāñ bedār hotā hai

isī manzar kā hissa ban ke maiñ tasvīr ho jaatī huuñ kho jaatī huuñ maazī meñ

meñ aksar ābnā-e-vaqt par kāġhaz kī naav Daal detī huuñ

to paanī apnā rasta moḌ detā hai

maiñ jab chāhūñ

salonī sāñvlī naT-khaT madhur yādeñ uThā lā.ūñ laḌakpan ke gharoñdoñ se

maiñ jab chāhūñ to kaalī koTharī meñ qaid

ranjīda pashemāñ zaḳhm-ḳhūrda-sā.atoñ biite dinoñ ko pyaar se chhū kar

dilāsa duuñ thapak kar loriyāñ duuñ

ḳhuub ro.uuñ ḳhuub ro.uuñ shānt ho jā.ūñ

ye maazī merā maazī hai

faqat mere tasarruf meñ hai

merī milkiyyat hai merā virsa hai

na merā haal par bas hai

aur aane vaalā kal bhī kis ne dekhā hai

unhen mujh se shikayat hai ki main mazi mein jiti hun

mere ashaar mein aaseb hain guzre zamanon ke

wo kahte hain ki yaaden sae ki manind mere sath rahti hain

ye sach hai is se kab inkar hai mujh ko

main aksar jagte din mein bhi aankhen mund leti hun

koi surat koi aawaz koi zaiqa ya lams jab jadu jagata hai

to gard-alud mina-taur taswiren achanak bolne lagti hain naTak-manch sajta hai

kisi TuTe hue sanduq mein rakkhe hue

bosida maKHtute se koi dastan tamsil ban jati hai

ji uThte hain sab kirdar mazi ke

sipahi baadshah KHilat nawadir raqs-o-mausiqi

kisi ke panw mein pael dhanak aanchal

kisi shamshir ki bijli ghani barsat ki badli

kisi bara-dari mein rag dipak ka

kisi sehn-e-gulistan mein kadam ke peD par baiThi hui chiDiyan

achanak jag jati hain

kisi gumnam qasbe mein koi TuTi hui mehrab KHasta-haal-DewDhi ki jhalak

madum kar deti hai hotel chae-KHane bas ke adde Dher kuDe ke

kai sadiyan guzar jati hain sar se

aur koi gum-gashta shahr-e-raftagan bedar hota hai

isi manzar ka hissa ban ke main taswir ho jati hun kho jati hun mazi mein

mein aksar aabna-e-waqt par kaghaz ki naw Dal deti hun

to pani apna rasta moD deta hai

main jab chahun

saloni sanwli naT-khaT madhur yaaden uTha laun laDakpan ke gharondon se

main jab chahun to kali koThari mein qaid

ranjida pasheman zaKHm-KHurda-saaton bite dinon ko pyar se chhu kar

dilasa dun thapak kar loriyan dun

KHub roun KHub roun shant ho jaun

ye mazi mera mazi hai

faqat mere tasarruf mein hai

meri milkiyyat hai mera wirsa hai

na mera haal par bas hai

aur aane wala kal bhi kis ne dekha hai