wahshat

mujhe vahshat kā matlab kab pata thā aaj se pahle

kabhī aisā huā ye dil zarā ghabrā gayā

to kah diyā ki dil bahut vahshat-zada hai

aur aisā bhī huā

gar saḳht lahje meñ kisī ne baat kī

yā baat rad kar dī

na koī kaam ho yā na niiñd aa.ī

to phir bhī kah diyā vahshat bahut hai

mujhe ye lafz achchhā hī bahut lagtā thā

par aise nahīñ dekho

ki maiñ ne us kā matlab aaj samjhā hai

maiñ gum-sum to nahīñ chup huuñ

mirī saarī tavajjoh mere hāthoñ par lagī hai

mere nāḳhun yuuñ hathelī meñ khube haiñ

dil ye kahtā hai

ki merī uñgliyāñ is jild ke nīche dabe

ik iztirābī se ḳhalā ko pur kareñ

yā phaaḌ Dāleñ ab

ka.ī lahreñ sī bechainī se yuuñ karvaT badaltī haiñ

mirā dil chāhtā hai ye

ki maiñ khīñch kar

ajab vahshat ke maqnātīs se juḌ kar

ḳhud apne kāñpte hāthoñ kī poroñ se nikal jā.ūñ

magar maiñ apne siine se ubhar kar

aa aTaktī huuñ halq meñ

ḳhushk hai jo pyaas se

un āñsuoñ se

jo nahīñ bante

yahāñ maiñ kahāñ jā.ūñ

na aage aa sakūñ maiñ aur na vāpas jā sakūñ maiñ ab

maiñ jaise band huuñ shīshe ke Dabbe meñ

maiñ apne ḳhvāb se apne halq se

jis qadar koshish karūñ

bāhar nikalne kī ubharne kī

to merā saañs ruktā hai

koī āvāz aatī hai

kahīñ andar hī lekin Duub jaatī hai

mujhe sab kahīñ par bhī nahīñ hotī

kisī ko maiñ nazar aatī huuñ par shāyad

use bhī apne andar se nikalne kā koī rasta nahīñ miltā

mujhe wahshat ka matlab kab pata tha aaj se pahle

kabhi aisa hua ye dil zara ghabra gaya

to kah diya ki dil bahut wahshat-zada hai

aur aisa bhi hua

gar saKHt lahje mein kisi ne baat ki

ya baat rad kar di

na koi kaam ho ya na nind aai

to phir bhi kah diya wahshat bahut hai

mujhe ye lafz achchha hi bahut lagta tha

par aise nahin dekho

ki main ne us ka matlab aaj samjha hai

main gum-sum to nahin chup hun

meri sari tawajjoh mere hathon par lagi hai

mere naKHun yun hatheli mein khube hain

dil ye kahta hai

ki meri ungliyan is jild ke niche dabe

ek iztirabi se KHala ko pur karen

ya phaD Dalen ab

kai lahren si bechaini se yun karwaT badalti hain

mera dil chahta hai ye

ki main khinch kar

ajab wahshat ke maqnatis se juD kar

KHud apne kanpte hathon ki poron se nikal jaun

magar main apne sine se ubhar kar

aa aTakti hun halq mein

KHushk hai jo pyas se

un aansuon se

jo nahin bante

yahan main kahan jaun

na aage aa sakun main aur na wapas ja sakun main ab

main jaise band hun shishe ke Dabbe mein

main apne KHwab se apne halq se

jis qadar koshish karun

bahar nikalne ki ubharne ki

to mera sans rukta hai

koi aawaz aati hai

kahin andar hi lekin Dub jati hai

mujhe sab kahin par bhi nahin hoti

kisi ko main nazar aati hun par shayad

use bhi apne andar se nikalne ka koi rasta nahin milta