walentina

ḳhalā meñ uḌ rahī hai ik hasīna

hai jis kā naam T valentinā

hai jis kī himmat-e-‘ālī ke aage

zamīn-o-āsmāñ sirf ek ziinā

farāz-e-bahr-e-charḳh-e-nīlgūñ par

vo jab khene lagī apnā safīnā

huī sharminda bazm-e-māh-o-anjum

jabīn-e-vaqt par aayā pasīnā

jo aayā rashk us par mushtarī ko

huā paidā dil-e-zohra meñ kiina

lagī ik Thes goyā kahkashāñ ko

chhalak paḌtā thā us kā ābgīnā

zamīñ kyā āsmāñ ke mai-kade meñ

khanakne lag ga.e ab jām-o-mīnā

jo marne se kabhī Darte nahīñ haiñ

unhīñ ko bas yahāñ aatā hai jiinā

chamaktā hai jahāñ meñ naam un kā

ki ho jaise añgūThī meñ nagīna

khule haiñ mai-kade sab ḳhum-kade bhī

magar aatā kahāñ hai ham ko piinā

hamīñ haiñ is ḳharābāt-e-jahāñ meñ

qarīne se hue jo be-qarīna

KHala mein uD rahi hai ek hasina

hai jis ka nam T walentina

hai jis ki himmat-e-‘ali ke aage

zamin-o-asman sirf ek zina

faraaz-e-bahr-e-charKH-e-nilgun par

wo jab khene lagi apna safina

hui sharminda bazm-e-mah-o-anjum

jabin-e-waqt par aaya pasina

jo aaya rashk us par mushtari ko

hua paida dil-e-zohra mein kina

lagi ek Thes goya kahkashan ko

chhalak paDta tha us ka aabgina

zamin kya aasman ke mai-kade mein

khanakne lag gae ab jam-o-mina

jo marne se kabhi Darte nahin hain

unhin ko bas yahan aata hai jina

chamakta hai jahan mein nam un ka

ki ho jaise anguThi mein nagina

khule hain mai-kade sab KHum-kade bhi

magar aata kahan hai hum ko pina

hamin hain is KHarabaat-e-jahan mein

qarine se hue jo be-qarina