watan ki jaan

kisān kaun hai hindostān kā pyārā

vatan kī jaan ġharīboñ kī aañkh kā taarā

kisān tū hī hameñ peT bhar khilātā hai

hamāre vāste ḳhud jaan ko khapātā hai

uThā.e kāñdhe pe hal ko ye shaan hai terī

harī-bharī jo ho pattī vo jaan hai terī

na ḳhauf dhuup kā hai kuchh na lū se Dartā hai

nahā nahā ke pasīne meñ kaam kartā hai

jamā jo khet meñ nibTā ke kaam ko palTā

ki muñh añdhere chalā ghar se shaam ko palTā

amiir tere gadā haiñ vo kaam hai terā

tamām qaum pe ehsān-e-ām hai terā

balā-e-fāqa-kashī tere dam se Taltī hai

tire hī faiz se sonā zamīñ ugaltī hai

anaaj achchhe se achchhā ugaa.e jaatā hai

javāharāt ye jau khā ke tū luTātā hai

basant aate hī khetī jo lahlahātī hai

hañsī sī kuchh tire hoñToñ pe lauT jaatī hai

ye rāt-din jo lagī khet kī hai dhun tujh ko

sikhā diye haiñ batā kisī ne aise gun tujh ko

ḳhushī meñ saarī thakāvaT ko bhuul jaatā hai

ki phūltī hai jo khetī tū phuul jaatā hai

zamīñ meñ biij jo Daalā to phal bhī pā ke rahā

vatan kī ḳhaak ko tū kīmiyā banā ke rahā

kisan kaun hai hindostan ka pyara

watan ki jaan gharibon ki aankh ka tara

kisan tu hi hamein peT bhar khilata hai

hamare waste KHud jaan ko khapata hai

uThae kandhe pe hal ko ye shan hai teri

hari-bhari jo ho patti wo jaan hai teri

na KHauf dhup ka hai kuchh na lu se Darta hai

naha naha ke pasine mein kaam karta hai

jama jo khet mein nibTa ke kaam ko palTa

ki munh andhere chala ghar se sham ko palTa

amir tere gada hain wo kaam hai tera

tamam qaum pe ehsan-e-am hai tera

bala-e-faqa-kashi tere dam se Talti hai

tere hi faiz se sona zamin ugalti hai

anaj achchhe se achchha ugae jata hai

jawaharaat ye jau kha ke tu luTata hai

basant aate hi kheti jo lahlahati hai

hansi si kuchh tere honTon pe lauT jati hai

ye raat-din jo lagi khet ki hai dhun tujh ko

sikha diye hain bata kisi ne aise gun tujh ko

KHushi mein sari thakawaT ko bhul jata hai

ki phulti hai jo kheti tu phul jata hai

zamin mein bij jo Dala to phal bhi pa ke raha

watan ki KHak ko tu kimiya bana ke raha