watan ki miTTi

mere vatan kī miTTī sonā ugal rahī hai

sabze kī ye hukūmat ye khet lahlahāte

patte havā se chhū kar ek raag sā sunāte

sotā huā muqaddar insān kā jagāte

paude nahīñ zamīñ se daulat ubal rahī hai

mere vatan kī miTTī sonā ugal rahī hai

makka hai yā zamurrad tan kar khaḌe hue haiñ

dhānoñ kī bāliyoñ meñ hiire jaḌe hue haiñ

bhuTTe haiñ jvaar ke yā motī jaḌe hue haiñ

iflās ke gale par talvār chal rahī hai

mere vatan kī miTTī sonā ugal rahī hai

jau meñ chhupī huī hai sheroñ se baḌh kar tāqat

paatā huuñ maiñ chane meñ sau sau tarah kī lazzat

gehūñ ko kyoñ na samjhūñ apnī vatan kī daulat

is ke hī bal pe saarī maḳhlūq meñ rahī hai

mere vatan kī miTTī sonā ugal rahī hai

phal phuul hoñ ki meve kyā se kyā yahāñ nahīñ hai

kānoñ kā ik ḳhazāna is mulk kī zamīñ hai

pukhrāj bhī yahīñ hai yāqūt bhī yahīñ hai

paane ko jin ko saarī duniyā machal rahī hai

mere vatan kī miTTī sonā ugal rahī hai

aisī zamīn pā kar ḳhushiyāñ na kyoñ manā.eñ

aapas kā bair chhoḌeñ mil-jul ke aish uḌā.eñ

duniyā meñ is zamīñ kī sab aabrū baḌhā.eñ

lāzim hai log sambhleñ duniyā sambhal rahī hai

mere vatan kī miTTī sonā ugal rahī hai

mere watan ki miTTi sona ugal rahi hai

sabze ki ye hukumat ye khet lahlahate

patte hawa se chhu kar ek rag sa sunate

sota hua muqaddar insan ka jagate

paude nahin zamin se daulat ubal rahi hai

mere watan ki miTTi sona ugal rahi hai

makka hai ya zamurrad tan kar khaDe hue hain

dhanon ki baaliyon mein hire jaDe hue hain

bhuTTe hain jwar ke ya moti jaDe hue hain

iflas ke gale par talwar chal rahi hai

mere watan ki miTTi sona ugal rahi hai

jau mein chhupi hui hai sheron se baDh kar taqat

pata hun main chane mein sau sau tarah ki lazzat

gehun ko kyon na samjhun apni watan ki daulat

is ke hi bal pe sari maKHluq mein rahi hai

mere watan ki miTTi sona ugal rahi hai

phal phul hon ki mewe kya se kya yahan nahin hai

kanon ka ek KHazana is mulk ki zamin hai

pukhraj bhi yahin hai yaqut bhi yahin hai

pane ko jin ko sari duniya machal rahi hai

mere watan ki miTTi sona ugal rahi hai

aisi zamin pa kar KHushiyan na kyon manaen

aapas ka bair chhoDen mil-jul ke aish uDaen

duniya mein is zamin ki sab aabru baDhaen

lazim hai log sambhlen duniya sambhal rahi hai

mere watan ki miTTi sona ugal rahi hai