wenus

pahnā ke zanjir-e-ābī banā taab kī

ab bhī jakḌe rakhā hai mujhe pāniyoñ ne

nafas merā paanī mirī ruuh paanī

mere aks kī lahar-dar-lahr sat.hoñ meñ sayyāl patvār khole haiñ dar aur darīchoñ kī tārīḳh ke

murta.ish murta.ish apnī phailī ragoñ kī farāvāniyoñ meñ

bahātā huuñ maiñ naġhma-zan kashtiyoñ ke charāġh

āsmānoñ kā ā.īna sar pe liye

phaḌ.phaḌāte kabūtar kī das laakh hairat bharī surḳh āñkhoñ meñ chakrā ke girte hue

sab kalīsā mahal aur qandaq ke sabz aur ālūda mehrāb o gumbad paanī

ayaañ mere siine kī sayyāl pahnā.iyoñ meñ

sehn-tā-sehn fāḳhtāoñ ke shahpar

tamaddun ke tevar

havā ke sutūñ-dar-sutūñ saare sayyāh paikar

ghule haiñ zamānoñ se paanī kī galiyoñ meñ tājir jahāzoñ ke zarḳhez phere

magar saarī ārā.ishoñ meñ samā kar

sarāboñ kī maujoñ ke ġhaibī thapeḌoñ ne pal pal nikhārā hai bosīda chehre ko mere

to apne hī nam aur ḳhvābīda sāyoñ se afsāne kahte hue ab

musalsal ravānī ke kāñdhoñ pe rahte hue ab

taġhayyur kā tūfāñ uThā.ūñ to kyā ho

tirī aañkh meñ Duub jā.ūñ to kyā ho

pahna ke zanjir-e-abi bana tab ki

ab bhi jakDe rakha hai mujhe paniyon ne

nafas mera pani meri ruh pani

mere aks ki lahar-dar-lahr sathon mein sayyal patwar khole hain dar aur darichon ki tariKH ke

murtaish murtaish apni phaili ragon ki farawaniyon mein

bahata hun main naghma-zan kashtiyon ke charagh

aasmanon ka aaina sar pe liye

phaDphaDate kabutar ki das lakh hairat bhari surKH aankhon mein chakra ke girte hue

sab kalisa mahal aur qandaq ke sabz aur aaluda mehrab o gumbad pani

ayan mere sine ki sayyal pahnaiyon mein

sehn-ta-sehn faKHtaon ke shahpar

tamaddun ke tewar

hawa ke sutun-dar-sutun sare sayyah paikar

ghule hain zamanon se pani ki galiyon mein tajir jahazon ke zarKHez phere

magar sari aaraishon mein sama kar

sarabon ki maujon ke ghaibi thapeDon ne pal pal nikhaara hai bosida chehre ko mere

to apne hi nam aur KHwabida sayon se afsane kahte hue ab

musalsal rawani ke kandhon pe rahte hue ab

taghayyur ka tufan uThaun to kya ho

teri aankh mein Dub jaun to kya ho