yaad

vo naġhme vo manāzir vo bahāreñ yaad haiñ mujh ko

yahī vo naqsh haiñ jo miT nahīñ sakte miTāne se

vo rāteñ aur vo sāvan kī phuvāreñ yaad haiñ mujh ko

yahī afsāne aksar kahtā rahtā huuñ zamāne se

vo terā muskurā kar chāñd ko tābindagī denā

sharāb-e-ishq se maḳhmūr ho jaanā fazāoñ kā

vo terī mast āñkhoñ kā naved-e-zindagī denā

vo aksar khelnā zulf-e-pareshāñ se havāoñ kā

mirā dil ho gayā hai gardish-e-ayyām se vāqif

buland-o-past aalam phir rahe haiñ merī āñkhoñ meñ

mazāq-e-dil-barī hai ishq ke paiġhām se vāqif

tasavvur hai mirā khoyā huā sā terī āñkhoñ meñ

tū mujh se duur hai lekin tujhe maiñ yaad kartā huuñ

na jab fariyād kartā thā na ab fariyād kartā huuñ

wo naghme wo manazir wo bahaaren yaad hain mujh ko

yahi wo naqsh hain jo miT nahin sakte miTane se

wo raaten aur wo sawan ki phuwaren yaad hain mujh ko

yahi afsane aksar kahta rahta hun zamane se

wo tera muskura kar chand ko tabindagi dena

sharab-e-ishq se maKHmur ho jaana fazaon ka

wo teri mast aankhon ka nawed-e-zindagi dena

wo aksar khelna zulf-e-pareshan se hawaon ka

mera dil ho gaya hai gardish-e-ayyam se waqif

buland-o-past aalam phir rahe hain meri aankhon mein

mazaq-e-dil-bari hai ishq ke paigham se waqif

tasawwur hai mera khoya hua sa teri aankhon mein

tu mujh se dur hai lekin tujhe main yaad karta hun

na jab fariyaad karta tha na ab fariyaad karta hun