yaadon ka lams

nahīñ tanhā nahīñ huuñ maiñ

tumhāre sehr ke dhāgoñ ne

mere jism-o-jāñ ko bāñdh rakhā hai

hasīñ yādoñ kā shīrīñ lams

merī ruuh ko chhū kar

mirī āñkhoñ se bahtā hai

tum apnī uñgliyoñ kī narm poroñ se

mire hāthoñ ko chhūte ho

bahut dhīre se

tum apne dahakte lab mire gāloñ pe rakh kar

āñsuoñ ko poñchh dete ho

maiñ apnī band āñkhoñ meñ

hasīñ qaus-e-quzah aur titliyoñ ke rañg taktī huuñ

mohabbat ke parinde giit gaate haiñ

fazā.eñ gungunātī haiñ

tumhāre bāzuoñ ne mere tan ko

thaam rakkhā hai

tumhārī saañs kī ḳhushbū

mirī sāñsoñ meñ uljhī hai

tumheñ chhūtī

tumheñ mahsūs kartī huuñ

maiñ tum se pyaar kartī huuñ

jidhar dekhūñ tumhī tum ho

har ik pal meñ tumhī tum ho

jahāñ tum ho vahīñ huuñ maiñ

nahīñ tanhā nahīñ huuñ maiñ

nahin tanha nahin hun main

tumhaare sehr ke dhagon ne

mere jism-o-jaan ko bandh rakha hai

hasin yaadon ka shirin lams

meri ruh ko chhu kar

meri aankhon se bahta hai

tum apni ungliyon ki narm poron se

mere hathon ko chhute ho

bahut dhire se

tum apne dahakte lab mere galon pe rakh kar

aansuon ko ponchh dete ho

main apni band aankhon mein

hasin qaus-e-quzah aur titliyon ke rang takti hun

mohabbat ke parinde git gate hain

fazaen gungunati hain

tumhaare bazuon ne mere tan ko

tham rakkha hai

tumhaari sans ki KHushbu

meri sanson mein uljhi hai

tumhein chhuti

tumhein mahsus karti hun

main tum se pyar karti hun

jidhar dekhun tumhi tum ho

har ek pal mein tumhi tum ho

jahan tum ho wahin hun main

nahin tanha nahin hun main