ye nafraten kyon

ye nafratoñ kī binā jaane kis ne Daalī hai

mohabbatoñ se bharā hai vatan kā har zarra

havā chale to har ik ghar ko

zindagī de de

ghaTā jo barse to banjar zamīñ harī kar de

bahār aa.e to dekhe na shaah aur na faqīr

guloñ ke rang se dhartī kī

godiyāñ bhar de

ye nafratoñ kā chalan phir kahāñ se aaya hai

kabhī ghaTāoñ ne ye bhed-bhāv rakkhā hai

havāoñ ne kabhī dair-o-haram ko parkhā hai

sahar kī dhuup na soche kahāñ nikalnā hai

na chhāñv dekhe kisī rāhgīr kā mansab

to phir ye zahr kī būñdeñ kahāñ se aa.ī haiñ

kisī ke saath zarā duur chal ke dekho to

kisī ke haath ko hāthoñ meñ le ke dekho to

kisī ke dard ko palkoñ se chun ke dekho to

haTā do āñkhoñ se parde ye nafratoñ ke agar

sab ek sā lage ka.aba ho yā kalīsā ho

na koī raam kā mandir na bābarī masjid

na gurudvāre ke dar par kisī kā pahra ho

diloñ ko jhukne jhukāne kā fan agar aa jaa.e

jahāñ se tafarqa-bāzī kā har chalan miT jaa.e

'ashok'-o-'akbar'-o-'gautam' ne farq kab rakkhā

chale the 'jauhar'-o-'gāñdhī' bhī ek saath sadā

liye 'javāhar'-o-'iqbāl' prem kī sauġhāt

ye sach hai

nānak-o-chishtī kā ḳhvāb ek hī thā

to un ke ḳhvāboñ kī ta.abīr kyoñ na sach kar deñ

mohabbatoñ se zamāne meñ raushnī bhar deñ

ye nafraton ki bina jaane kis ne Dali hai

mohabbaton se bhara hai watan ka har zarra

hawa chale to har ek ghar ko

zindagi de de

ghaTa jo barse to banjar zamin hari kar de

bahaar aae to dekhe na shah aur na faqir

gulon ke rang se dharti ki

godiyan bhar de

ye nafraton ka chalan phir kahan se aaya hai

kabhi ghaTaon ne ye bhed-bhaw rakkha hai

hawaon ne kabhi dair-o-haram ko parkha hai

sahar ki dhup na soche kahan nikalna hai

na chhanw dekhe kisi rahgir ka mansab

to phir ye zahr ki bunden kahan se aai hain

kisi ke sath zara dur chal ke dekho to

kisi ke hath ko hathon mein le ke dekho to

kisi ke dard ko palkon se chun ke dekho to

haTa do aankhon se parde ye nafraton ke agar

sab ek sa lage kaba ho ya kalisa ho

na koi ram ka mandir na babari masjid

na gurudware ke dar par kisi ka pahra ho

dilon ko jhukne jhukane ka fan agar aa jae

jahan se tafarqa-bazi ka har chalan miT jae

'ashok'-o-'akbar'-o-'gautam' ne farq kab rakkha

chale the 'jauhar'-o-'gandhi' bhi ek sath sada

liye 'jawahar'-o-'iqbaal' prem ki saughat

ye sach hai

nanak-o-chishti ka KHwab ek hi tha

to un ke KHwabon ki tabir kyon na sach kar den

mohabbaton se zamane mein raushni bhar den