zawal ke aaine mein zinda aks

jhuTpuTe ke shahr meñ

begānagī kī lahr meñ

mādūm hotī raushnī ke darmiyāñ

ziist ke paañv tale aa.e hue

log haiñ yā chyūñTiyāñ

tan badan kī rehl par

mohmal kitābeñ zard chehroñ kī khulīñ

manzaroñ kī khojtī bīnā.iyāñ māzūr haiñ

yaad rakhne kī tamannā

bhūlne kī aarzū

hāfize kī band muTThī meñ Thahartā kuchh nahīñ

har qadam ḳhvāb o ḳhayāl vasl kī lazzat liye

zaat ke niile samundar meñ kahīñ

in jazīroñ kī havā meñ saañs lete jo muqaddar meñ nahīñ

DhūñDte haiñ kashtiyoñ kā rāsta

har sub.h ke aḳhbār meñ

ḳhud-kalāmī kī saḌak par duur tak

(laḌkhaḌāte zard pattoñ kī tarah)

kholte haiñ kashmakash kī gaThriyāñ

khultī nahīñ

bhīgte haiñ tez bārish meñ nadāmat kī magar

ruuh kī ālūdgī dhultī nahīñ

jhuTpuTe ke shahr mein

beganagi ki lahr mein

madum hoti raushni ke darmiyan

zist ke panw tale aae hue

log hain ya chyunTiyan

tan badan ki rehl par

mohmal kitaben zard chehron ki khulin

manzaron ki khojti binaiyan mazur hain

yaad rakhne ki tamanna

bhulne ki aarzu

hafize ki band muTThi mein Thaharta kuchh nahin

har qadam KHwab o KHayal wasl ki lazzat liye

zat ke nile samundar mein kahin

in jaziron ki hawa mein sans lete jo muqaddar mein nahin

DhunDte hain kashtiyon ka rasta

har subh ke aKHbar mein

KHud-kalami ki saDak par dur tak

(laDkhaDate zard patton ki tarah)

kholte hain kashmakash ki gaThriyan

khulti nahin

bhigte hain tez barish mein nadamat ki magar

ruh ki aaludgi dhulti nahin