zindagi

kahte haiñ jis ko zindagī

maut bhī hai hayāt bhī

hai yahī kashmakash kā din

'aish-o-tarab kī raat bhī

socho to hai ye al-ġharaz

māya-e-jauhar-o-'araz

hai yahī asl meñ vujūd

hai yahī mumkināt bhī

is kī numūd meñ nihāñ

vahdat-o-kasrat-e-jahāñ

ahl-e-nazar ke rū-barū

zaat bhī hai sifāt bhī

hai yahī abr-e-nau-bahār

bād-e-ḳhizāñ se ham-kinār

hai yahī mehr-e-nīm-roz

zarra-e-kā.enāt bhī

is se hai husn ko ġhurūr

is se hai 'ishq nā-subūr

vasl kī hai kahāniyāñ

hijr kī vārdāt bhī

is se jahāñ meñ shor-o-ġhul

hai ye bahāduroñ kī mul

is se haiñ dar vā sulh ke

jang kī is se ghaat bhī

'azm-e-tasallut-e-jahāñ

is kī umang meñ nihāñ

hai yahī vaj.h-e-inqalāb

muzhda-dah-e-sabāt bhī

sū-e-'amal se hai ġhulām

husn-e-'amal se hai imaam

hai ye muharrik-e-fasād

'āmil-e-sālihāt bhī

maut-o-hayāt haiñ yahāñ

husn-e-'amal ke imtihāñ

zindagī hī hayāt hai

zindagī hī mamāt bhī

kahte haiñ jis ko zindagī

maut bhī hai hayāt bhī

fat.h-o-zafar kā hai ye din

jaur-o-sitam kī raat bhī

kahte hain jis ko zindagi

maut bhi hai hayat bhi

hai yahi kashmakash ka din

'aish-o-tarab ki raat bhi

socho to hai ye al-gharaz

maya-e-jauhar-o-'araz

hai yahi asl mein wujud

hai yahi mumkinat bhi

is ki numud mein nihan

wahdat-o-kasrat-e-jahan

ahl-e-nazar ke ru-baru

zat bhi hai sifat bhi

hai yahi abr-e-nau-bahaar

baad-e-KHizan se ham-kinar

hai yahi mehr-e-nim-roz

zarra-e-kaenat bhi

is se hai husn ko ghurur

is se hai 'ishq na-subur

wasl ki hai kahaniyan

hijr ki wardat bhi

is se jahan mein shor-o-ghul

hai ye bahaduron ki mul

is se hain dar wa sulh ke

jang ki is se ghat bhi

'azm-e-tasallut-e-jahan

is ki umang mein nihan

hai yahi wajh-e-inqalab

muzhda-dah-e-sabaat bhi

su-e-'amal se hai ghulam

husn-e-'amal se hai imam

hai ye muharrik-e-fasad

'amil-e-salihat bhi

maut-o-hayat hain yahan

husn-e-'amal ke imtihan

zindagi hi hayat hai

zindagi hi mamat bhi

kahte hain jis ko zindagi

maut bhi hai hayat bhi

fath-o-zafar ka hai ye din

jaur-o-sitam ki raat bhi