زندگی

سرگزشت نوحہ گر ہے زندگی

داستان اشک تر ہے زندگی

کیا اڑے گی وادیٔ امید میں

طائر بے بال و پر ہے زندگی

آنکھ جھپکی ہو گیا قصہ تمام

آہ کتنی مختصر ہے زندگی

پی کے بہکے کیوں نہ احساس وجود

ساغر جادو اثر ہے زندگی

ابتدائے زندگانی ہے اجل

انتہائے درد سر ہے زندگی

زندگی ہے رنج و غم کی داستاں

درد دل سوز جگر ہے زندگی

زیب گلشن منحصر ہے خار پر

درد دل پر منحصر ہے زندگی

جی رہا ہے تو بھی اے منظرؔ مگر

ایک ہی انداز پر ہے زندگی