پھر نہ باقی رہے غبار کبھی

ہولی کھیلو جو خاکساروں میں

اک بات پر قرار انہیں رات بھر نہیں

دو دو پہر جو ہاں ہے تو دو دو پہر نہیں

وہ اور مرض ہیں کہ شفا ہوتی ہے جن سے

اچھے کہیں ان آنکھوں کے بیمار ہوئے ہیں

چلتی تو ہے پر شوخئ رفتار کہاں ہے

تلوار میں پازیب کی جھنکار کہاں ہے

لوگ کہتے ہیں کہ فن شاعری منحوس ہے

شعر کہتے کہتے میں ڈپٹی کلکٹر ہو گیا

دریائے شراب اس نے بہایا ہے ہمیشہ

ساقی سے جو کشتی کے طلب گار ہوئے ہیں

سبز کپڑوں میں سیہ زلف کی زیبائی ہے

دھان کے کھیت میں کیا کالی گھٹا چھائی ہے

اس قدر محو نہ ہوں آپ خود آرائی میں

داغ لگ جائے نہ آئینۂ یکتائی میں

ہو گئے رام جو تم غیر سے اے جان جہاں

جل رہی ہے دل پر نور کی لنکا دیکھو

چالیس جام پی کے دیا ایک جام مے

ساقی نے خوب راہ نکالی زکوٰۃ کی

تری تعریف ہو اے صاحب اوصاف کیا ممکن

زبانوں سے دہانوں سے تکلم سے بیانوں سے

پورا کریں گے ہولی میں کیا وعدۂ وصال

جن کو ابھی بسنت کی اے دل خبر نہیں

ناؤ کاغذ کی تن خاکیٔ انساں سمجھو

غرق ہو جائیں گی چھینٹا جو پڑا پانی کا

نہ خنجر اٹھے گا نہ تلوار ان سے

یہ بازو مرے آزمائے ہوئے ہیں

ہیں دین کے پابند نہ دنیا کے مقید

کیا عشق نے اس بھول بھلیاں سے نکالا

تو جو تلوار سے نہلائے لہو میں مجھ کو

غسل صحت ہوا بھی عشق کی بیماری سے

ان کو عشاق ہی کے دل کی نہیں ہے تخصیص

کوئی شیشہ ہو پری بن کے اتر جاتے ہیں

اگر ان کو پوجا تو کیا کفر ہوگا

کہ بت بھی خدا کے بنائے ہوئے ہیں