ذرا اے جوش غم رہنے دے قابو میں زباں میری

وہ سننا چاہتے ہیں خود مجھی سے داستاں میری

جتنی توقعات تھیں سب ختم ہو چکیں

میں عارفیؔ کسی سے بھی اب سرگراں نہیں

توڑنا توبہ کا سو بار بھی آساں تھا مگر

جام مے مجھ سے تو اک بار بھی توڑا نہ گیا

سکون اضطراب غم پہ چارہ ساز تو خوش ہیں

دل بیتاب کی لیکن قضا معلوم ہوتی ہے

اب مرے واسطے ہر موج ہے آغوش سکوں

بحر غم میں جو نہیں ہے کوئی ساحل نہ سہی

محبت خود محبت کا صلہ ہے عارفیؔ لیکن

کوئی آسان ہے کیا بے نیاز مدعا ہونا

ایک ہی پھول تھا بس گل کدۂ حسن میں تو

چن لیا آنکھ میں اپنی ترے شیدائی نے

دل کو تپش شوق کی یہ لذت پیہم

مل تو گئی لیکن بڑی مشکل سے ملی ہے

مری ہر آہ آہ بے اثر ہے

وفور یاس تیری بد گمانی

بہت بدلا مذاق دل خیال یار نے لیکن

جو شایان مذاق یار تھا ایسا کہاں بدلا

ہے عارفیؔ اب یہ اثر ترک تمنا

آنے لگے وہ اور بھی کچھ حد سے سوا یاد

آئی خزاں کی یاد تو دل سرد ہو گیا

کچھ دیر بھی تو لطف نہ آیا بہار کا