درد بخشا چین چھینا دل کے ٹکڑے کر دیئے

ہائے کس ظالم پہ میں نے بھی بھروسہ کر لیا

مجھ کو کسی یزید کی بیعت نہیں قبول

نیزے یہ رکھو آؤ مرا سر بھی لے چلو

اپنی صورت دیکھنا ہو اپنے دل میں دیکھیے

دل سا دنیا میں کوئی بھی آئنہ ملتا نہیں

دل دیا وحشت لیا اور خود کو رسوا کر لیا

مختصر سی زندگی میں میں نے کیا کیا کر لیا

تکمیل وفا ہوش میں ممکن ہی نہیں تھا

دیوانہ سمجھ بوجھ کے دیوانہ بنا ہے

تخریب کے پردے میں ہی تعمیر ہے ساقی

شیشہ کوئی پگھلا ہے تو پیمانہ بنا ہے

بت یہاں ملتے نہیں ہیں یا خدا ملتا نہیں

عزم مستحکم تو ہو دنیا میں کیا ملتا نہیں

لغزش ساقیٔ میخانہ خدا خیر کرے

پھر نہ ٹوٹے کوئی پیمانہ خدا خیر کرے

کعبے میں تھا سکوں نہ کلیسا میں چین تھا

تجھ سے بچھڑ کے دن یہ گزارے کہاں کہاں

ڈھونڈھتا پھرتا ہے مجھ کو کیوں فریب رنگ و بو

میں وہاں ہوں خود جہاں اپنا پتہ ملتا نہیں