rātoñ kī niiñd ek parī-zād le uḌī

din kā sukūn fikr-e-ma.īshat meñ kho gayā

raaton ki nind ek pari-zad le uDi

din ka sukun fikr-e-maishat mein kho gaya

ḳhāmosh āñkheñ udaas chehra ye bikhrī zulfeñ bujhā bujhā man

ki ziist jaise huī hai beva utaar Daale tamām gahne

KHamosh aankhen udas chehra ye bikhri zulfen bujha bujha man

ki zist jaise hui hai bewa utar Dale tamam gahne

samajh aatā hai ham ko dukh baḌoñ kā

ham apne ghar ke bachchoñ meñ baḌe haiñ

samajh aata hai hum ko dukh baDon ka

hum apne ghar ke bachchon mein baDe hain

aisī haiñ qurbateñ ki mujhī meñ basā hai vo

aise haiñ fāsle ki nahīñ rābta nasīb

aisi hain qurbaten ki mujhi mein basa hai wo

aise hain fasle ki nahin rabta nasib

kuchh to kareñ ki dil ye kahīñ aur jā lage

kuchh der ke liye sahī āñkhoñ ko chain ho

kuchh to karen ki dil ye kahin aur ja lage

kuchh der ke liye sahi aankhon ko chain ho

chūmā thā ek din kisī gul kī jabīn ko

lahje se aaj tak mire ḳhushbū nahīñ ga.ī

chuma tha ek din kisi gul ki jabin ko

lahje se aaj tak mere KHushbu nahin gai

ye tirī marzī hai ab chaak ghumā yā na ghumā

ḳhud ko miTTī kī tarah sauñp diyā hai maiñ ne

ye teri marzi hai ab chaak ghuma ya na ghuma

KHud ko miTTi ki tarah saunp diya hai main ne

yuuñ to vo itr-dān thā lekin ye kyā huā

TuuTā to ek samt bhī ḳhushbū nahīñ ga.ī

yun to wo itr-dan tha lekin ye kya hua

TuTa to ek samt bhi KHushbu nahin gai

be-ḳhabar road pe in bhāgte bachchoñ ko maiñ

kitnī hasrat se thakan oḌhe hue dekhtā huuñ

be-KHabar road pe in bhagte bachchon ko main

kitni hasrat se thakan oDhe hue dekhta hun

kal raat maiñ bahut hī alag sā lagā mujhe

us kī nazar ne yuuñ mirī sūrat khañgālī dost

kal raat main bahut hi alag sa laga mujhe

us ki nazar ne yun meri surat khangali dost