ḳhāmosh āñkheñ udaas chehra ye bikhrī zulfeñ bujhā bujhā man

ki ziist jaise huī hai beva utaar Daale tamām gahne

KHamosh aankhen udas chehra ye bikhri zulfen bujha bujha man

ki zist jaise hui hai bewa utar Dale tamam gahne

samajh aatā hai ham ko dukh baḌoñ kā

ham apne ghar ke bachchoñ meñ baḌe haiñ

samajh aata hai hum ko dukh baDon ka

hum apne ghar ke bachchon mein baDe hain

rātoñ kī niiñd ek parī-zād le uḌī

din kā sukūn fikr-e-ma.īshat meñ kho gayā

raaton ki nind ek pari-zad le uDi

din ka sukun fikr-e-maishat mein kho gaya

aisī haiñ qurbateñ ki mujhī meñ basā hai vo

aise haiñ fāsle ki nahīñ rābta nasīb

aisi hain qurbaten ki mujhi mein basa hai wo

aise hain fasle ki nahin rabta nasib

chūmā thā ek din kisī gul kī jabīn ko

lahje se aaj tak mire ḳhushbū nahīñ ga.ī

chuma tha ek din kisi gul ki jabin ko

lahje se aaj tak mere KHushbu nahin gai