jiine ke liye aao koī raah nikāleñ

marne ke liye to abhī ik 'umr paḌī hai

jine ke liye aao koi rah nikalen

marne ke liye to abhi ek 'umr paDi hai

uTh ga.ī rasm mohabbat kī jahāñ se shāyad

ab nazar aatā nahīñ shahr meñ dil-bar koī

uTh gai rasm mohabbat ki jahan se shayad

ab nazar aata nahin shahr mein dil-bar koi

muḳhālifat se bhī hai saḳht zaḳhm yaarī kā

bahut hī gahrā lage hai jahāñ lage hai miyāñ

muKHalifat se bhi hai saKHt zaKHm yari ka

bahut hi gahra lage hai jahan lage hai miyan

reñgte haiñ kirmak-e-buġhz-o-'inād

shahr kā har jism hai dīmak-zada

rengte hain kirmak-e-bughz-o-'inad

shahr ka har jism hai dimak-zada

chehroñ pe to hai vaqt kī tahzīb kā ġhāza

jismoñ pe ghanī gard kudūrat kī jamī hai

chehron pe to hai waqt ki tahzib ka ghaza

jismon pe ghani gard kudurat ki jami hai

koī tahrīk to ubhre koī halchal to ho

koī patthar kisī jānib se idhar bhī pheñko

koi tahrik to ubhre koi halchal to ho

koi patthar kisi jaanib se idhar bhi phenko

maiñ apne qatl kī ḳhud kar rahā huuñ kyuuñ sāzish

mire lahū meñ nihāñ intiqām kis kā hai

main apne qatl ki KHud kar raha hun kyun sazish

mere lahu mein nihan intiqam kis ka hai

'aks us ke chehre kā chehra chehra dekhoge

vo zamīn hai to kal āsmān bhī hogā

'aks us ke chehre ka chehra chehra dekhoge

wo zamin hai to kal aasman bhi hoga