چپ رہو تو پوچھتا ہے خیر ہے

لو خموشی بھی شکایت ہو گئی

کیا کرشمہ ہے مرے جذبۂ آزادی کا

تھی جو دیوار کبھی اب ہے وہ در کی صورت

کچھ اندھیرے ہیں ابھی راہ میں حائل اخترؔ

اپنی منزل پہ نظر آئے گا انساں اک روز

ظلم سہتے رہے شکر کرتے رہے آئی لب تک نہ یہ داستاں آج تک

مجھ کو حیرت رہی انجمن میں تری کیوں ہیں خاموش اہل زباں آج تک

دشمنی کو برا نہ کہہ اے دوست

دیکھ کیا دوستی ہے غور سے دیکھ

عجیب بھول بھلیاں ہے شاہراہ حیات

بھٹکنے والے یہاں جستجو کی بات نہ کر

سہارا دے نہیں سکتے شکستہ پاؤں کو

ہٹاؤ راہ محبت سے رہنماؤں کو

ہو کوئی موج طوفاں یا ہوائے تند کا جھونکا

جو پہنچا دے لب ساحل اسی کو ناخدا سمجھو

اک حسن مکمل ہے تو اک عشق سراپا

ہشیار سا اک شخص ہے دیوانہ سا اک شخص

کیوں شکن پڑ گئی ہے ابرو پر

میں تو کہتا ہوں ایک بات کی بات

بندگی تیری خدائی سے بہت ہے آگے

نقش سجدہ ہے ترے نقش قدم سے پہلے

غم دل کا اثر ہر بزم میں ہے

سب افسانے اس افسانے سے نکلے

یہ رنگ و کیف کہاں تھا شباب سے پہلے

نظر کچھ اور تھی موج شراب سے پہلے

گلوں کا ذکر بہاروں میں کر چکے اخترؔ

اب آؤ ہوش میں برق و شرر کی بات کرو

ابھی بہار نے سیکھی کہاں ہے دل جوئی

ہزار داغ ابھی قلب لالہ زار میں ہیں

کیوں کرو اخترؔ کی باتیں وہ تو اک دیوانہ ہے

تم تو یارو اپنی اپنی داستاں کہتے رہو

راہ پر آ ہی گئے آج بھٹکنے والے

راہبر دیکھ وہ منزل کا نشاں ہے کہ نہیں

فتنوں کی ارزانی سے اب ایک اک تار آلودہ ہے

ہم دیکھیں کس کس کے دامن ایک بھی دامن پاک نہیں

ہم جو لٹے اس شہر میں جا کر دکھ لوگوں کو کیوں پہنچا

اپنی نظر تھی اپنا دل تھا کوئی پرایا مال نہ تھا

یہی ہیں یادگار غنچہ و گل اس زمانے میں

انہیں سوکھے ہوئے کانٹوں سے ذکر گلستاں لکھیے

بچا بچا کے گزرنا ہے دامن ہستی

شریک خار بھی کچھ جشن نو بہار میں ہیں

گل کھلائے نہ کہیں فتنۂ دوراں کچھ اور

آج کل دور مے و جام سے جی ڈرتا ہے