tamām shahr gale lag gayā to kyā hāsil

vo ham ko muñh jo lagā.e to eid ho jaa.e

tamam shahr gale lag gaya to kya hasil

wo hum ko munh jo lagae to eid ho jae

tum se kahā thā baam pe mat jaanā aaj shaam

dekhā naañ saare shahr kī to eid ho ga.ī

tum se kaha tha baam pe mat jaana aaj sham

dekha nan sare shahr ki to eid ho gai

maiñ jab jab bhī kisī kāġhaz pe terā naam likhtā huuñ

chamak tahrīr se aur mahak kāġhaz se aatī hai

main jab jab bhi kisi kaghaz pe tera nam likhta hun

chamak tahrir se aur mahak kaghaz se aati hai

maiñ ye āñkheñ bhī tirī nazr to kar duuñ lekin

terī tasvīr inheñ dekhtī rahtī hai bahut

main ye aankhen bhi teri nazr to kar dun lekin

teri taswir inhen dekhti rahti hai bahut

kyā kahūñ kyā surūr paayā hai

jab se vo haath haath aaya hai

kya kahun kya surur paya hai

jab se wo hath hath aaya hai

sar-ba-kaf ḳhud hī maiñ maqtal meñ chalā aaya huuñ

log kahte haiñ ki vo shoḳh hai shamshīr-ba-kaf

sar-ba-kaf KHud hi main maqtal mein chala aaya hun

log kahte hain ki wo shoKH hai shamshir-ba-kaf

zhāla-bārī se ḳhauf aatā hai

un kī aamad kahīñ na Tal jaa.e

zhaala-bari se KHauf aata hai

un ki aamad kahin na Tal jae

tarkash-o-dām kī hājat hī nahīñ hai tum ko

tum ho sayyād to ḳhud said hai fitrāk-ba-kaf

tarkash-o-dam ki hajat hi nahin hai tum ko

tum ho sayyaad to KHud said hai fitrak-ba-kaf

jab tirā qāmat-e-sho.ala-numā pahuñchā sar-e-bazm

saare hī shaiḳh khaḌe ho ga.e īmān-ba-kaf

jab tera qamat-e-shoala-numa pahuncha sar-e-bazm

sare hi shaiKH khaDe ho gae iman-ba-kaf