vatan ke log satāte the jab vatan meñ the

vatan kī yaad satātī hai jab vatan meñ nahīñ

watan ke log satate the jab watan mein the

watan ki yaad satati hai jab watan mein nahin

aaj 'anjum' muskurā kar us ne phir dekhā mujhe

shikva-e-jaur-o-jafā phir bhuul jaanā hī paḌā

aaj 'anjum' muskura kar us ne phir dekha mujhe

shikwa-e-jaur-o-jafa phir bhul jaana hi paDa

na pūchh us kī dil-afsurdagī kī kaifiyyat

jo ġham-nasīb ḳhushī meñ bhī muskurā na sakā

na puchh us ki dil-afsurdagi ki kaifiyyat

jo gham-nasib KHushi mein bhi muskura na saka

ye do-dilī meñ rahā ghar na ghaaT kā 'anjum'

butoñ ko kar na sakā ḳhush ḳhudā ko pā na sakā

ye do-dili mein raha ghar na ghaT ka 'anjum'

buton ko kar na saka KHush KHuda ko pa na saka

kaam 'anjum' kā jo tamām kiyā ye aap ne vāqa.ī ḳhuub kiyā

kam-baḳht isī ke laa.eq thā ab aap abas pachhtāte haiñ

kaam 'anjum' ka jo tamam kiya ye aap ne waqai KHub kiya

kam-baKHt isi ke laeq tha ab aap abas pachhtate hain