جو ہو سکے تو چلے آؤ آج میری طرف

ملے بھی دیر ہوئی اور جی اداس بھی ہے

درد محرومئ جاوید بھی اک دولت ہے

اہل غم بھی ترے شرمندۂ احساں نکلے

آج تک یاد ہے وہ شام جدائی کا سماں

تیری آواز کی لرزش ترے لہجے کی تھکن

کچھ نقش تری یاد کے باقی ہیں ابھی تک

دل بے سر و ساماں سہی ویراں تو نہیں ہے

خلوص نیت رہبر پہ منحصر ہے عظیمؔ

مقام عشق بہت دور بھی ہے پاس بھی ہے

کچھ آپ کا غم کچھ غم جاں کچھ غم دنیا

دامن میں مرے پھول بھی ہیں خار بھی خس بھی

کیا کیا فراغتیں تھیں میسر حیات کو

وہ دن بھی تھے کہ تیرے سوا کوئی غم نہ تھا

ہم درد کے مارے ہی گراں جاں ہیں وگرنہ

جینا تری فرقت میں کچھ آساں تو نہیں ہے

بے خودی میں جسے ہم سمجھے ہیں تیرا دامن

عین ممکن ہے کہ اپنا ہی گریباں نکلے

تجھ سے مل کے بھی تیرا انتظار رہتا ہے

صبح روئے خنداں سے شام زلف برہم تک

تنہائی کا سناٹا اور آتی جاتی راتیں

تیری یاد نہ اور کوئی غم پھر بھی نیند نہ آئے

ٹوٹا تو عزیز اور ہوا اہل وفا کو

دل بھی کہیں اس شوخ کا پیماں تو نہیں ہے

ایک درد ہستی نے عمر بھر رفاقت کی

ورنہ ساتھ دیتا ہے کون آخری دم تک

بیتابیٔ حیات میں آسودگی بھی تھی

کچھ تیرا غم بھی تھا غم دوراں کے ساتھ ساتھ

وہی یکسانیت شام و سحر ہے کہ جو تھی

زندگی دست بہ دل خاک بسر ہے کہ جو تھی

اب امتیاز ظاہر و باطن بھی مٹ گیا

دل چاک ہو رہا ہے گریباں کے ساتھ ساتھ

اب میرے ساتھ ان کی نظر بھی ہے بے قرار

نشتر تڑپ رہے ہیں رگ جاں کے ساتھ ساتھ