manzil pe nazar aa.ī bahut dūrī-e-manzil

be-sāḳhta aane lage sab rāh-numā yaad

manzil pe nazar aai bahut duri-e-manzil

be-saKHta aane lage sab rah-numa yaad

zindagānī kā lutf to 'azmat'

sirf tūfān kī panāh meñ hai

zindagani ka lutf to 'azmat'

sirf tufan ki panah mein hai

ye baat bhī hai ki tū bhī nahīñ hai ab merā

ye baat bhī hai ki tere sivā nahīñ koī

ye baat bhi hai ki tu bhi nahin hai ab mera

ye baat bhi hai ki tere siwa nahin koi

raushniyoñ ke shahar meñ rah kar

ham añdheroñ se rū-shanās rahe

raushniyon ke shahar mein rah kar

hum andheron se ru-shanas rahe

maut pahroñ udaas rahtī hai

ham agar zindagī se milte haiñ

maut pahron udas rahti hai

hum agar zindagi se milte hain

shu.ūr-e-zindagī kī raushnī meñ

shab-e-ġham bhī sahar se kam nahīñ hai

shuur-e-zindagi ki raushni mein

shab-e-gham bhi sahar se kam nahin hai

phuul kis be-dilī se hañste haiñ

aap kis be-dilī se milte haiñ

phul kis be-dili se hanste hain

aap kis be-dili se milte hain

masrūr-o-mutma.in haiñ bahut tājirān-e-vaqt

kyā zindagī ke ḳhvāb bhī nīlām ho ga.e

masrur-o-mutmain hain bahut tajiran-e-waqt

kya zindagi ke KHwab bhi nilam ho gae

ġham-e-imroz kā gila kyoñ ho

husn-e-fardā mirī nigāh meñ hai

gham-e-imroz ka gila kyon ho

husn-e-farda meri nigah mein hai

ab zamāne se aur kyā māñgūñ

daulat-e-ġham bahut ziyāda hai

ab zamane se aur kya mangun

daulat-e-gham bahut ziyaada hai

paas aa.e to kashish hai na jamāl-e-rañgīñ

duur se phuul nazar aa.e the ḳhush-rū kitne

pas aae to kashish hai na jamal-e-rangin

dur se phul nazar aae the KHush-ru kitne

zindagī tīrgī-e-shab hī nahīñ

sub.h kī raushnī bhī hotī hai

zindagi tirgi-e-shab hi nahin

subh ki raushni bhi hoti hai

ḳhudā jaane zamāna aaj kis hālat meñ rahtā hai

ki vīrānoñ se baḌh kar hai chaman-zāroñ kī rusvā.ī

KHuda jaane zamana aaj kis haalat mein rahta hai

ki viranon se baDh kar hai chaman-zaron ki ruswai

jo bijliyoñ kī panāhoñ meñ tum banā sakte

to is qadar na tumheñ ḳhauf-e-āshiyāñ hotā

jo bijliyon ki panahon mein tum bana sakte

to is qadar na tumhein KHauf-e-ashiyan hota

kal ye mumkin hai ki lahrā.eñ ḳhushī ke giit bhī

har nazar meñ aaj ik ḳhāmosh sā aalam sahī

kal ye mumkin hai ki lahraen KHushi ke git bhi

har nazar mein aaj ek KHamosh sa aalam sahi

ābād mai-kade bhī haiñ dair-o-haram bhī nahīñ

lekin na aadmī ko milā koī aadmī

aabaad mai-kade bhi hain dair-o-haram bhi nahin

lekin na aadmi ko mila koi aadmi

tajrabāt-e-ġham se 'azmat' ko milā

ye shu.ūr-e-fan ye andāz-e-ġhazal

tajrabaat-e-gham se 'azmat' ko mila

ye shuur-e-fan ye andaz-e-ghazal