aa jaa.e na dil aap kā bhī aur kisī par

dekho mirī jaañ aañkh laḌānā nahīñ achchhā

aa jae na dil aap ka bhi aur kisi par

dekho meri jaan aankh laDana nahin achchha

gulābī gaal par kuchh rañg mujh ko bhī jamāne do

manāne do mujhe bhī jān-e-man tyauhār holī meñ

gulabi gal par kuchh rang mujh ko bhi jamane do

manane do mujhe bhi jaan-e-man tyauhaar holi mein

na bosa lene dete haiñ na lagte haiñ gale mere

abhī kam-umr haiñ har baat par mujh se jhijakte haiñ

na bosa lene dete hain na lagte hain gale mere

abhi kam-umr hain har baat par mujh se jhijakte hain

ye chaar din ke tamāshe haiñ aah duniyā ke

rahā jahāñ meñ sikandar na aur na jam baaqī

ye chaar din ke tamashe hain aah duniya ke

raha jahan mein sikandar na aur na jam baqi

jahāñ dekho vahāñ maujūd merā kirshn pyārā hai

usī kā sab hai jalva jo jahāñ meñ āshkārā hai

jahan dekho wahan maujud mera kirshn pyara hai

usi ka sab hai jalwa jo jahan mein aashkara hai

ruḳh-e-raushan pe us kī gesū-e-shab-gūñ laTakte haiñ

qayāmat hai musāfir rāsta din ko bhaTakte haiñ

ruKH-e-raushan pe us ki gesu-e-shab-gun laTakte hain

qayamat hai musafir rasta din ko bhaTakte hain

abhī to aa.e ho jaldī kahāñ hai jaane kī

uTho na pahlū se Thahro zarā kidhar ko chale

abhi to aae ho jaldi kahan hai jaane ki

uTho na pahlu se Thahro zara kidhar ko chale

kisī pahlū nahīñ chain aatā hai ushshāq ko tere

taḌapte haiñ fuġhāñ karte haiñ aur karvaT badalte haiñ

kisi pahlu nahin chain aata hai ushshaq ko tere

taDapte hain fughan karte hain aur karwaT badalte hain

ho gayā lāġhar jo us lailā-adā ke ishq meñ

misl-e-majnūñ haal merā bhī fasāna ho gayā

ho gaya laghar jo us laila-ada ke ishq mein

misl-e-majnun haal mera bhi fasana ho gaya

ġhāfil itnā husn pe ġhurra dhyān kidhar hai tauba kar

āḳhir ik din sūrat ye sab miTTī meñ mil jā.egī

ghafil itna husn pe ghurra dhyan kidhar hai tauba kar

aaKHir ek din surat ye sab miTTi mein mil jaegi

mar ga.e ham par na aa.e tum ḳhabar ko ai sanam

hausla ab dil kā dil hī meñ mirī jaañ rah gayā

mar gae hum par na aae tum KHabar ko ai sanam

hausla ab dil ka dil hi mein meri jaan rah gaya

but-e-kāfir jo tū mujh se ḳhafā ho

nahīñ kuchh ḳhauf merā bhī ḳhudā hai

but-e-kafir jo tu mujh se KHafa ho

nahin kuchh KHauf mera bhi KHuda hai

kisī pahlū nahīñ ārām aatā tere āshiq ko

dil-e-muztar taḌaptā hai nihāyat be-qarārī hai

kisi pahlu nahin aaram aata tere aashiq ko

dil-e-muztar taDapta hai nihayat be-qarari hai

masal sach hai bashar kī qadar ne.amat ba.ad hotī hai

sunā hai aaj tak ham ko bahut vo yaad karte haiñ

masal sach hai bashar ki qadar neamat baad hoti hai

suna hai aaj tak hum ko bahut wo yaad karte hain

baat karne meñ jo lab us ke hue zer-o-zabar

ek saa.at meñ tah-o-bālā zamāna ho gayā

baat karne mein jo lab us ke hue zer-o-zabar

ek saat mein tah-o-baala zamana ho gaya

chhānī kahāñ na ḳhaak na paayā kahīñ tumheñ

miTTī mirī ḳharāb abas dar-ba-dar huī

chhani kahan na KHak na paya kahin tumhein

miTTi meri KHarab abas dar-ba-dar hui

qabr meñ rāhat se so.e the na thā mahshar kā ḳhauf

ba.az aa.e ai masīhā ham tire e.ajāz se

qabr mein rahat se soe the na tha mahshar ka KHauf

baz aae ai masiha hum tere eajaz se

ai 'rasā' jaisā hai bargashta zamāna ham se

aisā bargashta kisī kā na muqaddar hogā

ai 'rasa' jaisa hai bargashta zamana hum se

aisa bargashta kisi ka na muqaddar hoga

kis gul ke tasavvur meñ hai ai laala jigar-ḳhūñ

ye daaġh kaleje pe uThānā nahīñ achchhā

kis gul ke tasawwur mein hai ai lala jigar-KHun

ye dagh kaleje pe uThana nahin achchha

ye kah do bas maut se ho ruḳhsat kyuuñ nāhaq aa.ī hai us kī shāmat

ki dar talak vo masīh-ḳhaslat mirī ayādat ko aa chuke haiñ

ye kah do bas maut se ho ruKHsat kyun nahaq aai hai us ki shamat

ki dar talak wo masih-KHaslat meri ayaadat ko aa chuke hain