un se chhīñke se koī chiiz utarvā.ī hai

kaam kā kaam hai añgḌā.ī kī añgḌā.ī hai

un se chhinke se koi chiz utarwai hai

kaam ka kaam hai angDai ki angDai hai

sham.a kuchh phūkne ke vāste ghar par nahīñ jaatī

fidā ullū kā paTThā aa ke ḳhud parvāna hotā hai

shama kuchh phukne ke waste ghar par nahin jati

fida ullu ka paTTha aa ke KHud parwana hota hai

shab-e-visāl meñ dāḌhī muñDā.ī kaam aa.ī

lipaT ga.e vo mujhe naujavāñ ke dhoke meñ

shab-e-visal mein daDhi munDai kaam aai

lipaT gae wo mujhe naujawan ke dhoke mein

be-dhaḌak ghar meñ tire ġhair chale aate haiñ

āñkheñ kyā phuuT ga.ī haiñ tire darbānoñ kī

be-dhaDak ghar mein tere ghair chale aate hain

aankhen kya phuT gai hain tere darbanon ki

kabhī na tum ko ġharīboñ kā kuchh ḳhayāl huā

usī ke ho ga.e jis kī girah meñ maal huā

kabhi na tum ko gharibon ka kuchh KHayal hua

usi ke ho gae jis ki girah mein mal hua

aire ġhaire na kahīñ hashr meñ tum ko lipTeñ

ek fihrist banā lījiye dīvānoñ kī

aire ghaire na kahin hashr mein tum ko lipTen

ek fihrist bana lijiye diwanon ki

gayā bachpan shabāb aayā buḌhāpā aane vaalā hai

magar maiñ to abhī tak aap ko bachcha samajhtā huuñ

gaya bachpan shabab aaya buDhapa aane wala hai

magar main to abhi tak aap ko bachcha samajhta hun

'būm' sāhib pe jo ābādī meñ paḌtī hai latāḌ

raah le lete haiñ sīdhī vo bayābānoñ kī

'bum' sahib pe jo aabaadi mein paDti hai lataD

rah le lete hain sidhi wo bayabanon ki

na pūchho tum ko aur dushman ko dil meñ kyā samajhtā huuñ

use ullū tumheñ ullū kā maiñ paTThā samajhtā huuñ

na puchho tum ko aur dushman ko dil mein kya samajhta hun

use ullu tumhein ullu ka main paTTha samajhta hun

buum sāhab kā ajab rang nirālā dekhā

yaar yāroñ meñ hai aġhyār hai aġhyāroñ meñ

bum sahab ka ajab rang nirala dekha

yar yaron mein hai aghyar hai aghyaron mein

bas ab bārah baras ke ho ga.e ḳhatna karā Daalo

musalmānī na ho jis kī musalmāñ ho nahīñ saktā

bas ab barah baras ke ho gae KHatna kara Dalo

musalmani na ho jis ki musalman ho nahin sakta

jo pūchhā ġhair ke ghar kyoñ ga.e to farmāyā

pahuñch ga.e vahāñ tere makāñ ke dhoke meñ

jo puchha ghair ke ghar kyon gae to farmaya

pahunch gae wahan tere makan ke dhoke mein

agar dil ko bachātā maiñ na zulfoñ ke aḌañge se

to duniyā bhar se lambī shām-e-furqat aur ho jaatī

agar dil ko bachata main na zulfon ke aDange se

to duniya bhar se lambi sham-e-furqat aur ho jati

laḌte hī pahlī nazar jaan tasadduq kar dī

ho gayā saath hī āġhāz ke anjām mirā

laDte hi pahli nazar jaan tasadduq kar di

ho gaya sath hi aaghaz ke anjam mera

paḌe haiñ saiñkaḌoñ teġh-e-nigāh ke zaḳhmī

ki achchhā ḳhāsā tirā ghar hī haspatāl huā

paDe hain sainkaDon tegh-e-nigah ke zaKHmi

ki achchha KHasa tera ghar hi haspatal hua

muḳhālif party pichhle mazāmīnoñ ko rotī hai

hamārī shā.erī kī aaj duniyā aur hī kuchh hai

muKHalif party pichhle mazaminon ko roti hai

hamari shaeri ki aaj duniya aur hi kuchh hai

duā.eñ māñgtā huuñ is liye baavā ke marne kī

ki jo daulat hai un kī mā-badaulat hone vaalī hai

duaen mangta hun is liye bawa ke marne ki

ki jo daulat hai un ki ma-badaulat hone wali hai

paḌeñ juute hazāroñ sar pe lekin maiñ na niklūñgā

tere kūche ke ham-sar bāġh-e-rizvāñ ho nahīñ saktā

paDen jute hazaron sar pe lekin main na niklunga

tere kuche ke ham-sar bagh-e-rizwan ho nahin sakta

ye hastī bhī kuchh hastī hai ye jiinā bhī kuchh jiinā hai

do din khāne ko miltā hai aur do din faaqe hote haiñ

ye hasti bhi kuchh hasti hai ye jina bhi kuchh jina hai

do din khane ko milta hai aur do din faqe hote hain

jo chhoTī moTī qaumeñ haiñ duniyā meñ maza uḌātī haiñ

jo ḳhāndān ke achchhe haiñ bhaTToñ pe īñTeñ Dhote haiñ

jo chhoTi moTi qaumen hain duniya mein maza uDati hain

jo KHandan ke achchhe hain bhaTTon pe inTen Dhote hain

dushman kī chāplūsī se kuchh fā.eda nahīñ

saale ko bevaqūf banā.e hue to huuñ

dushman ki chaplusi se kuchh faeda nahin

sale ko bewaquf banae hue to hun

le ke us shoḳh ko ārām se chhat par soyā

ġhair ko Daal diyā bāñdh ke shahtīr ke saath

le ke us shoKH ko aaram se chhat par soya

ghair ko Dal diya bandh ke shahtir ke sath

ġhair jab ḳhalvat se niklā dauḌ kar maiñ ne kahā

dūsrā bhī aap kā ummīd-vār aa hī gayā

ghair jab KHalwat se nikla dauD kar main ne kaha

dusra bhi aap ka ummid-war aa hi gaya

ḳhauf-e-badnāmī se go aksar chhupāyā jurm ko

lab par un kā naam phir bhī baar baar aa hī gayā

KHauf-e-badnami se go aksar chhupaya jurm ko

lab par un ka nam phir bhi bar bar aa hi gaya

aisī piirī se laakh behtar thā

TuuTā phūTā shabāb kā aalam

aisi piri se lakh behtar tha

TuTa phuTa shabab ka aalam

sharāb-e-nāb kī kartā mazammat phir na bhūle se

jo mai-ḳhāne meñ vaa.iz kī marammat aur ho jaatī

sharab-e-nab ki karta mazammat phir na bhule se

jo mai-KHane mein waiz ki marammat aur ho jati

javānī kā zamāna phir javānī kā zamāna hai

bache insān kitnā hī tabī'at aa.ī jaatī hai

jawani ka zamana phir jawani ka zamana hai

bache insan kitna hi tabi'at aai jati hai

hazāroñ raat guzrīñ is tarah se dil ko bahlāte

vo ab aate haiñ ab tashrīf un kī aa.ī jaatī hai

hazaron raat guzrin is tarah se dil ko bahlate

wo ab aate hain ab tashrif un ki aai jati hai

buḌhāpā hai ki mujh par rāt-din vo aa.e jaatā hai

javānī hai ki tujh par raat aur din chhā.ī jaatī hai

buDhapa hai ki mujh par raat-din wo aae jata hai

jawani hai ki tujh par raat aur din chhai jati hai