aaj us ne hañs ke yuuñ pūchhā mizāj

umr bhar ke ranj-o-ġham yaad aa ga.e

aaj us ne hans ke yun puchha mizaj

umr bhar ke ranj-o-gham yaad aa gae

ye uḌī uḌī sī rañgat ye khule khule se gesū

tirī sub.h kah rahī hai tirī raat kā fasāna

ye uDi uDi si rangat ye khule khule se gesu

teri subh kah rahi hai teri raat ka fasana

rahtā nahīñ insān to miT jaatā hai ġham bhī

so jā.eñge ik roz zamīñ oḌh ke ham bhī

rahta nahin insan to miT jata hai gham bhi

so jaenge ek roz zamin oDh ke hum bhi

kis kis kī zabāñ rokne jā.ūñ tirī ḳhātir

kis kis kī tabāhī meñ tirā haath nahīñ hai

kis kis ki zaban rokne jaun teri KHatir

kis kis ki tabahi mein tera hath nahin hai

kuchh log jo savār haiñ kāġhaz kī naav par

tohmat tarāshte haiñ havā ke dabāv par

kuchh log jo sawar hain kaghaz ki naw par

tohmat tarashte hain hawa ke dabaw par

tum sāda-mizājī se miTe phirte ho jis par

vo shaḳhs to duniyā meñ kisī kā bhī nahīñ hai

tum sada-mizaji se miTe phirte ho jis par

wo shaKHs to duniya mein kisi ka bhi nahin hai

maiñ hairāñ huuñ ki kyuuñ us se huī thī dostī apnī

mujhe kaise gavāra ho ga.ī thī dushmanī apnī

main hairan hun ki kyun us se hui thi dosti apni

mujhe kaise gawara ho gai thi dushmani apni

jo de rahe ho zamīñ ko vahī zamīñ degī

babūl bo.e to kaise gulāb niklegā

jo de rahe ho zamin ko wahi zamin degi

babul boe to kaise gulab niklega

aur kuchh der sitāro Thahro

us kā va.ada hai zarūr aa.egā

aur kuchh der sitaro Thahro

us ka wada hai zarur aaega

zaḳhm pe zaḳhm khā ke jī apne lahū ke ghūñT pī

aah na kar laboñ ko sī ishq hai dil-lagī nahīñ

zaKHm pe zaKHm kha ke ji apne lahu ke ghunT pi

aah na kar labon ko si ishq hai dil-lagi nahin

haañ aap ko dekhā thā mohabbat se hamīñ ne

jī saare zamāne ke gunahgār hamīñ the

han aap ko dekha tha mohabbat se hamin ne

ji sare zamane ke gunahgar hamin the

vafā kā ahd thā dil ko sambhālne ke liye

vo hañs paḌe mujhe mushkil meñ Dālne ke liye

wafa ka ahd tha dil ko sambhaalne ke liye

wo hans paDe mujhe mushkil mein Dalne ke liye

'ehsān' apnā koī bure vaqt kā nahīñ

ahbāb bevafā haiñ ḳhudā be-niyāz hai

'ehsan' apna koi bure waqt ka nahin

ahbab bewafa hain KHuda be-niyaz hai

husn ko duniyā kī āñkhoñ se na dekh

apnī ik tarz-e-nazar ījād kar

husn ko duniya ki aankhon se na dekh

apni ek tarz-e-nazar ijad kar

shorish-e-ishq meñ hai husn barābar kā sharīk

soch kar jurm-e-tamannā kī sazā do ham ko

shorish-e-ishq mein hai husn barabar ka sharik

soch kar jurm-e-tamanna ki saza do hum ko

na jaane mohabbat kā anjām kyā hai

maiñ ab har tasallī se ghabrā rahā huuñ

na jaane mohabbat ka anjam kya hai

main ab har tasalli se ghabra raha hun

log yuuñ dekh ke hañs dete haiñ

tū mujhe bhuul gayā ho jaise

log yun dekh ke hans dete hain

tu mujhe bhul gaya ho jaise

zabt bhī sabr bhī imkān meñ sab kuchh hai magar

pahle kam-baḳht mirā dil to mirā dil ho jaa.e

zabt bhi sabr bhi imkan mein sab kuchh hai magar

pahle kam-baKHt mera dil to mera dil ho jae

kaun detā hai mohabbat ko parastish kā maqām

tum ye insāf se socho to duā do ham ko

kaun deta hai mohabbat ko parastish ka maqam

tum ye insaf se socho to dua do hum ko

'ehsān' aisā talḳh javāb-e-vafā milā

ham is ke ba.ad phir koī armāñ na kar sake

'ehsan' aisa talKH jawab-e-wafa mila

hum is ke baad phir koi arman na kar sake

aaise anjān bane baiThe ho

tum ko kuchh bhī na patā ho jaise

aaise anjaan bane baiThe ho

tum ko kuchh bhi na pata ho jaise

uTThā jo abr dil kī umañgeñ chamak uThīñ

lahrā.īñ bijliyāñ to maiñ lahrā ke pī gayā

uTTha jo abr dil ki umangen chamak uThin

lahrain bijliyan to main lahra ke pi gaya

balā se kuchh ho ham 'ehsān' apnī ḳhū na chhoḌeñge

hamesha be-vafāoñ se mileñge bā-vafā ho kar

bala se kuchh ho hum 'ehsan' apni KHu na chhoDenge

hamesha be-wafaon se milenge ba-wafa ho kar

ḳhaak se saiñkaḌoñ uge ḳhurshīd

hai añdherā magar charāg-tale

KHak se sainkaDon uge KHurshid

hai andhera magar charag-tale

maiñ jis raftār se tūfāñ kī jānib baḌhtā jaatā huuñ

usī raftār se nazdīk sāhil hotā jaatā hai

main jis raftar se tufan ki jaanib baDhta jata hun

usi raftar se nazdik sahil hota jata hai

ham haqīqat haiñ to taslīm na karne kā sabab

haañ agar harf-e-ġhalat haiñ to miTā do ham ko

hum haqiqat hain to taslim na karne ka sabab

han agar harf-e-ghalat hain to miTa do hum ko

ye kaun hañs ke sehn-e-chaman se guzar gayā

ab tak haiñ phuul chaak garebāñ kiye hue

ye kaun hans ke sehn-e-chaman se guzar gaya

ab tak hain phul chaak gareban kiye hue

marne vaale fanā bhī parda hai

uTh sake gar to ye hijāb uThā

marne wale fana bhi parda hai

uTh sake gar to ye hijab uTha

dil kī shaguftagī ke saath rāhat-e-mai-kada ga.ī

fursat-e-mai-kashī to hai hasrat-e-mai-kashī nahīñ

dil ki shaguftagi ke sath rahat-e-mai-kada gai

fursat-e-mai-kashi to hai hasrat-e-mai-kashi nahin

satā lo mujhe zindagī meñ satā lo

khulegā pas-e-marg ehsān kyā thā

sata lo mujhe zindagi mein sata lo

khulega pas-e-marg ehsan kya tha

suntā huuñ surañgoñ the farishte mire huzūr

maiñ jaane apnī zaat ke kis marhale meñ thā

sunta hun surangon the farishte mere huzur

main jaane apni zat ke kis marhale mein tha

ham chaTāneñ haiñ koī ret ke sāhil to nahī

shauq se shahr-panāhoñ meñ lagā do ham ko

hum chaTanen hain koi ret ke sahil to nahi

shauq se shahr-panahon mein laga do hum ko

maqsad-e-zīst ġham-e-ishq hai sahrā ho ki shahr

baiTh jā.eñge jahāñ chāho biThā do ham ko

maqsad-e-zist gham-e-ishq hai sahra ho ki shahr

baiTh jaenge jahan chaho biTha do hum ko

kuchh apne sāz-e-nafas kī na qadr kī tū ne

ki is rabāb se behtar koī rabāb na thā

kuchh apne saz-e-nafas ki na qadr ki tu ne

ki is rabab se behtar koi rabab na tha

damak rahā hai jo nas nas kī tishnagī se badan

is aag ko na tirā pairahan chhupā.egā

damak raha hai jo nas nas ki tishnagi se badan

is aag ko na tera pairahan chhupaega

ye ujāloñ ke jazīre ye sarāboñ ke dayār

sehr-o-afsūñ ke sivā jashn-e-tarab kuchh bhī nahīñ

ye ujalon ke jazire ye sarabon ke dayar

sehr-o-afsun ke siwa jashn-e-tarab kuchh bhi nahin

kise ḳhabar thī ki ye daur-e-ḳhud-ġharaz ik din

junūñ se qīmat-e-dār-o-rasan chhupā.egā

kise KHabar thi ki ye daur-e-KHud-gharaz ek din

junun se qimat-e-dar-o-rasan chhupaega

fusūn-e-sher se ham us mah-e-gurezāñ ko

ḳhalāoñ se sar-e-kāġhaz utaar laa.e haiñ

fusun-e-sher se hum us mah-e-gurezan ko

KHalaon se sar-e-kaghaz utar lae hain

ba-juz us ke 'ehsān' ko kyā samajhiye

bahāroñ meñ khoyā huā ik sharābī

ba-juz us ke 'ehsan' ko kya samajhiye

bahaaron mein khoya hua ek sharabi

avval avval jab mujhe jaur-āshnā samjhā thā maiñ

aaj samjhā huuñ jo samjhā thā bajā samjhā thā maiñ

awwal awwal jab mujhe jaur-ashna samjha tha main

aaj samjha hun jo samjha tha baja samjha tha main