noImage

Ejaz Warsi

Moradabad, India

maiñ us ke aib us ko batātā bhī kis tarah

vo shaḳhs aaj tak mujhe tanhā nahīñ milā

main us ke aib us ko batata bhi kis tarah

wo shaKHs aaj tak mujhe tanha nahin mila

aap aa.e haiñ haal pūchhā hai

ham ne aise bhī ḳhvāb dekhe haiñ

aap aae hain haal puchha hai

hum ne aise bhi KHwab dekhe hain

chaḌhte sūraj mudārāt se pahle 'ejāz'

soch lo kitne charāġh us ne bujhā.e hoñge

chaDhte suraj ki mudaraat se pahle 'ejaz'

soch lo kitne charagh us ne bujhae honge

rāh-rau bach ke chal daraḳhtoñ se

dhuup dushman nahīñ hai saa.e haiñ

rah-rau bach ke chal daraKHton se

dhup dushman nahin hai sae hain

ai sañg-e-āstāñ mire sajdoñ laaj rakh

aayā huuñ e'tirāf-e-shikast-e-ḳhudī liye

ai sang-e-astan mere sajdon ki laj rakh

aaya hun e'tiraf-e-shikast-e-KHudi liye

barsoñ meñ bhī chhū jaa.e kisī ko to ġhanīmat

ḳhushbu-e-vafā yaaro baḌī sust-qadam hai

barson mein bhi chhu jae kisi ko to ghanimat

KHushbu-e-wafa yaro baDi sust-qadam hai

darbānoñ tak ke chehre ra.ūnat se masḳh haiñ

dast-e-talab liye hue phir bhī khaḌe haiñ log

darbanon tak ke chehre raunat se masKH hain

dast-e-talab liye hue phir bhi khaDe hain log