دیکھ سقراط نے بس زہر پیا تھا لیکن

زندگی میں تو تجھے گھول کے پی جاؤں گی

کچھ اس لیے بھی مجھے کامیابی ملتی ہے

میں اپنے بابا کے نقش قدم پہ چلتی ہوں

تمہاری یاد ہے ماتم کناں ابھی مجھ میں

تمہارا درد ابھی تک سیہ لباس میں ہے

آج پھر تم کو ہم نے دیکھا ہے

آج محشر بنی ہیں یہ آنکھیں

میرے خوابوں میں روز آتی ہیں

اپنی آنکھیں سنبھال کر رکھیے

ہم نے غزلوں میں جو اتارا ہے

تری آنکھوں کا استعارہ ہے

جب وہ کہتی ہے یوں کہ اف توبہ

میری توبہ ہی ٹوٹ جاتی ہے

وقت جب آئنہ دکھاتا ہے

آدمی خود کو بھول جاتا ہے

مجھ کو ہر لمحہ مری ماں سے محبت ہے ربابؔ

میں کسی روز بھلا دوں اسے ممکن ہی نہیں

میری بینائی کم نہیں ہوگی

میری آنکھوں میں ماں کا چہرہ ہے

عشق جب سے مجھے میسر ہے

خود کو ہوتی نہیں میسر میں

کہا اس نے بتاؤ میرے بن یہ زندگی کیا ہے

کہا میں نے وہی جو پانیوں میں جھاگ ہوتے ہیں

مجھ سے پوچھا جو کسی نے تری پہچان بتا

میں پکاری میں تمہاری میں تمہاری مولا

تیرگی جو بڑھتی ہے اک دیا جلاتی ہوں

یوں بھی اپنی ہستی کو آئنہ بناتی ہوں

کوزہ گر میں تری محبت میں

اپنی صورت بگاڑ لیتی ہوں

عکس جو آسماں پہ رکھا ہے

ایک دن آئنہ میں اترے گا

سر پہ گر سائباں نہیں تو کیا

بھیا میرا تو کل جہاں ہو تم