yahāñ ham baiTh kar chaa.e ke ik cup ko taraste haiñ

vahāñ sab le ke biscuit cake ke ambār baiThe haiñ

yahan hum baiTh kar chae ke ek cup ko taraste hain

wahan sab le ke biscuit cake ke ambar baiThe hain

daal roTī se pareshān haiñ hujre ke makīn

maulvī murġh churā.e to ġhazal hotī hai

dal roTi se pareshan hain hujre ke makin

maulwi murgh churae to ghazal hoti hai

apnī shoḳhī se na baaz aa.e tum ab bhī 'hammād'

shaiḳh se pūchh liyā rāsta mai-ḳhāne kā

apni shoKHi se na baz aae tum ab bhi 'hammad'

shaiKH se puchh liya rasta mai-KHane ka

naukar huuñ dāmād nahīñ huuñ kartā huuñ ghar ke sab kaam

thakan se haal ḳharāb hai merā piilā ho gayā maañ kā laal

naukar hun damad nahin hun karta hun ghar ke sab kaam

thakan se haal KHarab hai mera pila ho gaya man ka lal

is kī har ek baat maiñ chupke se maan letā huuñ

jis ko ho jaan o dil aziiz us ke ḳhilāf jaa.e kyuuñ

is ki har ek baat main chupke se man leta hun

jis ko ho jaan o dil aziz us ke KHilaf jae kyun

shab biitī chāñd bhī Duub chalā ab paañv dabānā band karo

uTTho jaldī aaTā gūñdho tumheñ nāshta nahīñ banānā kyā

shab biti chand bhi Dub chala ab panw dabana band karo

uTTho jaldi aaTa gundho tumhein nashta nahin banana kya

saas aa jaa.e to kyuuñ ghar se chipak jaatī hai

ye muamma hai samajhne kā na samjhāne kā

sas aa jae to kyun ghar se chipak jati hai

ye muamma hai samajhne ka na samjhane ka

biivī kī zabān-darāzī se jhunjhlāte ho ghabrāte ho

jab shādī kar hī baiThe ho to phir ab shor machānā kyā

biwi ki zaban-daraazi se jhunjhlate ho ghabraate ho

jab shadi kar hi baiThe ho to phir ab shor machana kya

dahal jaate haiñ biivī kī garaj se

bas ab kuchh aisī hālat ho ga.ī hai

dahal jate hain biwi ki garaj se

bas ab kuchh aisi haalat ho gai hai

saas susar kī ḳhidmat meñ hameñ saarā din lag jaatā thā

phir bhī ham ko biivī ne har baat pe DaañT pilā.ī thī

sas susar ki KHidmat mein hamein sara din lag jata tha

phir bhi hum ko biwi ne har baat pe DanT pilai thi

izzat-e-nafs kā saudā kar ke ḳhuun ke ghūñT piye har dam

bhīgī billī ban kar ham ne apnī umr bitā.ī thī

izzat-e-nafs ka sauda kar ke KHun ke ghunT piye har dam

bhigi billi ban kar hum ne apni umr bitai thi

hamārī billī aur ham se hī myā.ūñ haa.e rī qismat

magar ham kyā kareñ ki qaul apnā haar baiThe haiñ

hamari billi aur hum se hi myaun hae ri qismat

magar hum kya karen ki qaul apna haar baiThe hain