سید افتخارحسین افتخار اعظمی کا شمار معروف ترقی پسند شعرا میں ہوتا ہے لیکن انہوں نے ترقی پسند نظریاتی جبر کو اپنی شاعری اور تخلیقی تجربے پر حاوی نہیں ہونے دیا ۔

افتخار اعظمی کی پیدائش ۱۹۳۵میں املی پور اعظم گڑھ میں ہوئی ۔ ان کا خاندان مذہبی روایات ونظریات کا حامل تھا ، ان کے والد مولانا سید عبدالحمید ممبئی کی ایک مسجد میں پیش امام تھے لیکن وہ ان کی شخصیت پر اس ماحول کا اثر نہیں پڑا ، وہ اپنی زندگی اور شاعری میں مارکسی نظریے کو جیتے رہے ۔ افتخار اعظمی نے ابتدا میں کیفی اعظمی سے اصلاح لی جو ان کی ہم وطن ہونے کے ساتھ ساتھ ان کے قریبی دوست بھی تھے ۔ ان کا شعری مجموعہ ’’ کن ‘‘ کے نام سے شائع ہوا ۔ دوسرا مجموعہ ’’ ان کہی ‘‘ کے نام سے ترتیب دیا لیکن ۱۲ مارچ ۱۹۷۷ کو وہ اس دنیا سے کوچ کر گئے اور یہ مجموعہ ان کی زندگی میں شائع نہ ہوسکا ۔