us ne hāthoñ kī lakīroñ se baġhāvat kī thī

ab jahāñ hogā mirī tarah vo tanhā hogā

us ne hathon ki lakiron se baghawat ki thi

ab jahan hoga meri tarah wo tanha hoga

jab shahr meñ dushman mirā koī bhī nahīñ thā

phir kaun ye ḳhanjar kī zabāñ bol rahā hai

jab shahr mein dushman mera koi bhi nahin tha

phir kaun ye KHanjar ki zaban bol raha hai

yuuñ to qadam qadam pe ḳhudā saiñkaḌoñ mile

banda na mil sakā koī bandoñ ke shahr meñ

yun to qadam qadam pe KHuda sainkaDon mile

banda na mil saka koi bandon ke shahr mein

majbūr kā shikva kyā majbūr kī aaheñ kyā

ye aap kī duniyā hai bas aap kī chaltī hai

majbur ka shikwa kya majbur ki aahen kya

ye aap ki duniya hai bas aap ki chalti hai

ham ne ḳhud bhar diyā paimāne meñ apnā hī lahū

jab bhī maiḳhāne kī tauqīr pe aañch aa.ī hai

hum ne KHud bhar diya paimane mein apna hi lahu

jab bhi maiKHane ki tauqir pe aanch aai hai

koshisheñ ik hameñ miTāne kī

rasm sī ban ga.ī zamāne kī

koshishen ek hamein miTane ki

rasm si ban gai zamane ki

ek shīshe ke muqābil the hazāroñ patthar

TuuT kar mere bikharne kī kahānī hai yahī

ek shishe ke muqabil the hazaron patthar

TuT kar mere bikharne ki kahani hai yahi

ġham-gusārī pyaar hamdardī vafā

ye dukāneñ shahr ke bāhar lagā

gham-gusari pyar hamdardi wafa

ye dukanen shahr ke bahar laga

duur ham kar na sake kor-nigāhī apnī

vo thā pahle bhī qarīb-e-rag-e-jāñ aaj bhī hai

dur hum kar na sake kor-nigahi apni

wo tha pahle bhi qarib-e-rag-e-jaan aaj bhi hai

barg-e-āvāra ko ab apnā pata yaad nahīñ

kyā huā tez havāoñ kī pazīrā.ī meñ

barg-e-awara ko ab apna pata yaad nahin

kya hua tez hawaon ki pazirai mein

zabt-e-ġham kā mire andāza bhalā kyā hotā

maiñ agar dasht na hotā bhī to dariyā hotā

zabt-e-gham ka mere andaza bhala kya hota

main agar dasht na hota bhi to dariya hota

hamāre gaañv se bārish ḳhulūs kī le jā

ki tere shahr kā sab kuchh alaav par hogā

hamare ganw se barish KHulus ki le ja

ki tere shahr ka sab kuchh alaw par hoga

saare māhaul kī rag rag meñ nasha dauḌ gayā

mai kī barsāt hai yā aap kī añgḌā.ī hai

sare mahaul ki rag rag mein nasha dauD gaya

mai ki barsat hai ya aap ki angDai hai

jal-bujhī hogī koī aag kisī din us meñ

be-sabab hī to nahīñ daaġh 'qamar' meñ aayā

jal-bujhi hogi koi aag kisi din us mein

be-sabab hi to nahin dagh 'qamar' mein aaya

us 'qamar' ko hai ḳhud ab apne hī chehre kī talāsh

jis ko duniyā ne kahā aaj kā gyānī hai yahī

us 'qamar' ko hai KHud ab apne hi chehre ki talash

jis ko duniya ne kaha aaj ka gyani hai yahi

ruḳhsat-e-chashm-e-tamāsha kā hai mātam varna

ik ḳhalish pahlū meñ rahtī thī jahāñ aaj bhī hai

ruKHsat-e-chashm-e-tamasha ka hai matam warna

ek KHalish pahlu mein rahti thi jahan aaj bhi hai

mire hī hisse meñ azmat salīb-o-dār kī thī

mujhe hī ahd kā apne rasūl honā thā

mere hi hisse mein azmat salib-o-dar ki thi

mujhe hi ahd ka apne rasul hona tha

phir koī ḳhanjar chalā.e phir koī khīñche kamāñ

rafta rafta dil kā har ik zaḳhm bhartā jaa.e hai

phir koi KHanjar chalae phir koi khinche kaman

rafta rafta dil ka har ek zaKHm bharta jae hai

maiñ hī kyā sach boltā thā shahr meñ

kyoñ mujhe hī aa ke ye patthar lagā

main hi kya sach bolta tha shahr mein

kyon mujhe hi aa ke ye patthar laga

jab Duub ga.ī kashtī ye raaz khulā ham par

dariyā ke talātum meñ rū-posh kināre the

jab Dub gai kashti ye raaz khula hum par

dariya ke talatum mein ru-posh kinare the