apne sāmān ko bāñdhe hue is soch meñ huuñ

jo kahīñ ke nahīñ rahte vo kahāñ jaate haiñ

apne saman ko bandhe hue is soch mein hun

jo kahin ke nahin rahte wo kahan jate hain

maiñ ab kisī kī bhī ummīd toḌ saktā huuñ

mujhe kisī pe bhī ab koī e'tibār nahīñ

main ab kisi ki bhi ummid toD sakta hun

mujhe kisi pe bhi ab koi e'tibar nahin

kyā hai jo ho gayā huuñ maiñ thoḌā bahut ḳharāb

thoḌā bahut ḳharāb to honā bhī chāhiye

kya hai jo ho gaya hun main thoDa bahut KHarab

thoDa bahut KHarab to hona bhi chahiye

maiñ chāhtā huuñ mohabbat mujhe fanā kar de

fanā bhī aisā ki jis kī koī misāl na ho

main chahta hun mohabbat mujhe fana kar de

fana bhi aisa ki jis ki koi misal na ho

ab mirā dhyān kahīñ aur chalā jaatā hai

ab koī film mukammal nahīñ dekhī jaatī

ab mera dhyan kahin aur chala jata hai

ab koi film mukammal nahin dekhi jati

TūTne par koī aa.e to phir aisā TuuTe

ki jise dekh ke har dekhne vaalā TuuTe

TuTne par koi aae to phir aisa TuTe

ki jise dekh ke har dekhne wala TuTe

apnī tā.īd pe ḳhud aql bhī hairān huī

dil ne aise mire ḳhvāboñ kī himāyat kī hai

apni taid pe KHud aql bhi hairan hui

dil ne aise mere KHwabon ki himayat ki hai

lag rahā hai ye narm lahje se

phir tujhe koī mas.ala huā hai

lag raha hai ye narm lahje se

phir tujhe koi masala hua hai

ham bhī kaise ek hī shaḳhs ke ho kar rah jaa.eñ

vo bhī sirf hamārā kaise ho saktā hai

hum bhi kaise ek hi shaKHs ke ho kar rah jaen

wo bhi sirf hamara kaise ho sakta hai

kaise kisī kī yaad hameñ zinda rakhtī hai

ek ḳhayāl sahārā kaise ho saktā hai

kaise kisi ki yaad hamein zinda rakhti hai

ek KHayal sahaara kaise ho sakta hai

kar kuchh aisā ki tujhe yaad rakhūñ

bhuul jaane kā taqāzā hī sahī

kar kuchh aisa ki tujhe yaad rakhun

bhul jaane ka taqaza hi sahi

maiñ is ḳhayāl se jaate hue use na milā

ki rok leñ na kahīñ sāmne khaḌe aañsū

main is KHayal se jate hue use na mila

ki rok len na kahin samne khaDe aansu

agar vo karne pe aatā to kuchh bhī kar jaatā

ye soch mat ki akelā sharār kyā kartā

agar wo karne pe aata to kuchh bhi kar jata

ye soch mat ki akela sharar kya karta

ye nā-guzīr hai ummīd kī numū ke liye

guzartā vaqt kahīñ tham gayā to kyā hogā?

ye na-guzir hai ummid ki numu ke liye

guzarta waqt kahin tham gaya to kya hoga?

nahīñ aisā bhī ki yaksar nahīñ rahne vaalā

dil meñ ye shor barābar nahīñ rahne vaalā

nahin aisa bhi ki yaksar nahin rahne wala

dil mein ye shor barabar nahin rahne wala

aao taqrīb-e-rū-numā.ī kareñ

paañv meñ ek aabla huā hai

aao taqrib-e-ru-numai karen

panw mein ek aabla hua hai