اپنے سامان کو باندھے ہوئے اس سوچ میں ہوں

جو کہیں کے نہیں رہتے وہ کہاں جاتے ہیں

میں اب کسی کی بھی امید توڑ سکتا ہوں

مجھے کسی پہ بھی اب کوئی اعتبار نہیں

کیا ہے جو ہو گیا ہوں میں تھوڑا بہت خراب

تھوڑا بہت خراب تو ہونا بھی چاہئے

میں چاہتا ہوں محبت مجھے فنا کر دے

فنا بھی ایسا کہ جس کی کوئی مثال نہ ہو

اب مرا دھیان کہیں اور چلا جاتا ہے

اب کوئی فلم مکمل نہیں دیکھی جاتی

ٹوٹنے پر کوئی آئے تو پھر ایسا ٹوٹے

کہ جسے دیکھ کے ہر دیکھنے والا ٹوٹے

اپنی تائید پہ خود عقل بھی حیران ہوئی

دل نے ایسے مرے خوابوں کی حمایت کی ہے

لگ رہا ہے یہ نرم لہجے سے

پھر تجھے کوئی مسئلہ ہوا ہے

ہم بھی کیسے ایک ہی شخص کے ہو کر رہ جائیں

وہ بھی صرف ہمارا کیسے ہو سکتا ہے

کیسے کسی کی یاد ہمیں زندہ رکھتی ہے

ایک خیال سہارا کیسے ہو سکتا ہے

کر کچھ ایسا کہ تجھے یاد رکھوں

بھول جانے کا تقاضا ہی سہی

میں اس خیال سے جاتے ہوئے اسے نہ ملا

کہ روک لیں نہ کہیں سامنے کھڑے آنسو

اگر وہ کرنے پہ آتا تو کچھ بھی کر جاتا

یہ سوچ مت کہ اکیلا شرار کیا کرتا

یہ ناگزیر ہے امید کی نمو کے لیے

گزرتا وقت کہیں تھم گیا تو کیا ہوگا؟

نہیں ایسا بھی کہ یکسر نہیں رہنے والا

دل میں یہ شور برابر نہیں رہنے والا

آؤ تقریب رو نمائی کریں

پاؤں میں ایک آبلہ ہوا ہے