زندگی کی بھی یقیناً کوئی منزل ہوگی

یہ سفر ہی کی طرح ایک سفر ہے کہ نہیں

ایسے کھوئے سحر کے دیوانے

لوٹ کر شام تک نہ گھر آئے

غم انساں کو سینے سے لگا لو

یہ خدمت بندگی سے کم نہیں ہے

آپ سے یاد آپ کی اچھی

آپ تو ہم کو بھول جاتے ہیں

طوفاں سے بچ کے ڈوبی ہے کشتی کہاں نہ پوچھ

ساحل بھی اعتبار کے قابل نہیں رہا

یہی آئنہ ہے وہ آئینہ جو لئے ہے جلوۂ آگہی

یہ جو شاعری کا شعور ہے یہ پیمبری کی تلاش ہے

عناصر کی کوئی ترتیب قائم رہ نہیں سکتی

تغیر غیر فانی ہے تغیر جاودانی ہے

حسن کی بے رخی کو اہل نظر

حاصل التفات کہتے ہیں

اگر دنیا تجھے دیوانہ کہتی ہے تو کہنے دے

وفاداران الفت پر یہی الزام آتا ہے

خدا محفوظ رکھے انتشار رہنمائی سے

اسی منزل پہ آ کے آدمی دیوانہ ہوتا ہے

بچوں کا سا مزاج ہے تخلیق کار کا

اپنے سوا کسی کو بڑا مانتا نہیں

آئے تھے بے نیاز تری بارگاہ میں

جاتے ہیں اک ہجوم تمنا لیے ہوئے

آدمی اور درد سے نا آشنا ممکن نہیں

عکس سے خالی ہو کوئی آئینہ ممکن نہیں

رموز عشق و محبت سے آشنا ہوں میں

کسی کو غمزدہ دیکھا تو رو دیا ہوں میں

غم کی تشریح ہنسی کھیل نہیں ہے کوئی

پہلے انسان تو بن پھر یہ ہنر پیدا کر

یہ زندگی جسے اپنا سمجھ رہے ہیں سب

ہے مستعار فقط رونق جہاں کے لیے

گلشن کے پرستارو تم کو تو پتا ہوگا

وہ کون ہیں آخر جو کلیوں کو مسلتے ہیں

تری سمجھ میں نہ آ سکے گی کسی کے اشکوں کی قدر و قیمت

ابھی ہے ناآشنائے غم تو ابھی ترا دل دکھا نہیں ہے

ہو نہ جب تک متینؔ کیف غم

آدمی کو خدا نہیں ملتا

متینؔ ان کا کرم واقعی کرم ہے تو پھر

یہ بے رخی یہ تغافل یہ برہمی کیا ہے

غم مآل غم زندگی غم دوراں

ہمارے عشق کا چرچا کہاں کہاں نہ رہا

ہم تو آشفتہ سری سے نہ سنورنے پائے

آپ سے کیوں نہ سنوارا گیا گیسو اپنا

آتش گل کوئی چنگاری نہیں شعلہ نہیں

پھول کھلتے ہیں تو گلشن مرا جلتا کیوں ہے

کبھی کبھی تو محبت کی زندگی کے لئے

خود ان کو ہم نے ابھارا ہے برہمی کے لئے

گمرہی راہ نمائی کے مقابل آئی

وقت نے دیکھیے دیوار پہ لکھا کیا ہے

فضا میں گونج رہی ہیں کہانیاں غم کی

ہمیں کو حوصلۂ شرح داستاں نہ رہا

ہم کائنات صدق کو سانچے میں ڈھال کر

دوشیزۂ زباں کی وراثت میں لائے ہیں